最近常常煮野食, 可能煮多咗, 再加上兔寶寶而家晚上瞓得比較定, 我無可能同佢一樣瞓咁多嘛~ 於是想搵D野攪吓...
上文提過, 我真係想學整多D野食, 等第二時兔寶寶一日一日長大時都不致於失禮...
一早已經物色一個平平地又細細地嘅焗爐, 上網摷定D資料, 尋日襯大少放假, 就走去睇了.
真係好多謝大少呀~ 聽到我話想買焗爐, 二話不說就陪我買, 幫我抬返屋企不突止, 知道我要頻頻撲撲去買其他烘焙用品, 仲主動幫我執好位大抺一餐再拆箱放好...
所以有時大少真係幾抵錫的...
(原諒我side篇幅去讚美他, 否則可能沒有下次的.....
)當然得把口去講多謝係唔夠的; 而我呢個無業遊民如果話請佢食飯都係搵佢笨, 羊毛出自羊身上....
於是尋晚我就破例响大少放假嘅時間煮咗餐飯喇, 仲要係全部都係大少喜歡的食物...
首先有白灼蝦一斤, 大少喜愛大蝦, 所以就買了頗大的蝦...
灼完之後先後悔, 始終咁大嘅蝦用來灼係"side side"地,
下次應該整蒜蓉開邊蒸....
不過大少很喜歡, 因為這些蝦有很多膏.
之後有蒸魚...
我本來無打算買魚的, 說實話我從來都未煮過一整條連埋魚眼的魚....
有一段時間我在日本生活, 需要輪流煮飯, 有次買了一尾還未劏的魚,
我心諗, 以前讀biology劏老鼠都係咁啦,
點知到真係攞起把刀, 我見到條魚望住我,
我即刻包返住條魚放返入雪櫃, 等人地整好了...
不過今次要感謝大少, 點都要俾D誠意先得...
再加上買蝦時果個老闆娘撩我買一條不知名的魚(好似多寶魚咁, 但唔係)
我話俾佢知我未蒸過魚, 唔知攪唔攪得掂,
佢就叫我買另一條叫"紅鮋"嘅魚, 仲話: "25蚊, 俾埋你!"
咁就買埋了, 佢仲教我蒸8 分鐘...
仲有一碟大少鐘意的腐乳通菜炒牛肉
雪櫃有一早煲定雪凍的綠豆沙, 呢餐好完滿呢!
本來諗住煮飯都無煮了....
跟住我洗完碗, 大少抺地, 同兔寶寶沖晒涼, 攪掂埋佢瞓覺豬
, 我就開始我第一個烘焙產品了.
嘻嘻, 未買焗爐之前, 我已經好恨整呢樣野了..
因為我好鍾意食, 但係宜家賣得愈來愈貴...
可以自己整就最好不過了...
兔寶寶: 係咩呀?! 媽咪你快D講啦, 講咁多野...
我整咗芝士波波呀!
都幾成功嫁!
食味同"山崎"嘅都幾似...
不過因為我整嚟當消夜,
我落咗D蝦皮落去換一半嘅芝士,
無咁肥嘛!
我係買"預伴粉"整的, 所以都幾簡單...
只係我做漏一樣野, 另呢D波波有一個缺點...
當我焗完攞出嚟, 聞到好香, 攤咗一陣;
先發覺呢D波波係拎唔起的!
因為我完全無意識到要响個盤掃油!
所以有時單單睇食譜係唔夠的,
經驗就係經驗, 真係要累積出來....
剷D波波上嚟時整到個底爛晒,
幸好我只係整咗10個, 又係自己食, 無所謂啦!
想問吓各位朋友, 係咪掃油就得, 定要鋪層牛油紙响底呢??
呢個芝士波波, 對我來說, 是成功的, 雖然我不能一整個拎起來吃,
但係好好味, 有蝦皮的咸香,
又有芝士的香味(我無用芝士粉, 落咗一塊車打芝士, 'meat'碎佢)
最重要係我食時唔覺得佢好油!
响山崎買果D, 我'meat'開食嘅時候, D手指會好油,
好有罪惡感...
而家自己焗, 同大少好快食晒10個, 都覺得唔係好肥...
哈哈哈, 我起初諗住自己食一個架咋, 留返俾大少再夜D食,
但實在忍唔住了....
兔寶寶好快可以同我地一齊食, 唔洗剩係眼光光得個睇字了...
沒有留言:
張貼留言