我好少正正式式煮一餐飯,
最主要係大少返夜唔會响屋企食晚飯;
佢晚上一係食自己, 一係就返去兔寶寶嫲嫲屋企食,
順便探下對仔女.
到放假天又唔鍾意留响屋企,
除非係大時大節唔想出街食俾人屈.
不過又要大時大節又要撞著佢放假,
命中率嘅機會真係少之又少.
所以我一年煮餐正式飯嘅次數係一隻手數得晒架!
通常下午煮吓粉麵,
晚上煮烚D菜肉豆腐又或者滾個湯解決自己果餐就算,
而家就煮埋兔寶寶兩餐飯仔.
尋晚電視直播選委答問大會,
大少好想留响屋企睇.
本來打算睇完出街食, 但我好攰唔想攪到咁夜,
不如自己煮早D食完飯慢慢睇好過喇!
五點幾落到街市, 好多野都賣晒,
唔知係未好多人都打算留响屋企等睇show呢?
大少落order要食冬瓜, 又話要食牛丸,
不過佳寶賣淨一舊溶溶爛爛嘅冬瓜,
所以我買咗兩個節瓜, 九個幾差不多10蚊.
再响街市買鮮冬菇同秀珍菇, 夾埋16蚊.
又响魚蛋檔買咗半磅約10粒牛丸, 廿蚊.
响雪櫃摷執蝦米, 滾個節瓜湯,
有湯飲有餸食, 成個餸差不多要50蚊...
買條魚俾兔寶寶食,
一條貴花魚35蚊, 買多兩蚊芫茜.
好在煮煮吓覺得好似唔多夠餸,
攞兩隻蛋加隻咸蛋蒸碟水蛋.
唔計碟蛋同蝦米, 成餐飯都要八十幾蚊,
同走落茶餐廳叫兩個炒小菜差不多.
仲要食完都唔多夠飽!
下次真係要煮埋飯先得喇! 唔夠餸就食白飯啦!!
沒有留言:
張貼留言