我真係焗上癮呀!!
唔焗過果日唔舒服呀!!
話說我湊住兔寶寶, 唔係咁方便隨時隨地行得開,
上兩次去"二德惠", 我好似D自由行咁,
都未知自己要整D乜,
就高根粉呀, 低根粉呀, 發粉呀, 梳打粉呀都買晒返嚟,
仲有牛油, 忌廉, 朱古力, 芝士....
D模具, 唧咀又求奇墊咗一兩件,
返到屋企自就住我有嘅材料搵食譜!!
今次我又抄考咗....
唔係, 係參考咗blog友JO姐姐嘅超薄pizza....
因為我想試吓搓麵粉,
為我嘗試搓飽飽做準備...
諗住就算搓得唔好發酵得唔靚都無咁覺眼!!
當然, 我呢個係核突版...
係呀, 今次無靚相睇,
因為我搓得好核突, 完全轆唔倒個長方型出嚟,
事實上有宜家呢個型狀都係我補補貼貼又再轆轆個粉糰得出來的,
焗起都算有一個型狀, 不過個邊又係"岩岩蠶蠶'的!!
不過咁, 我做呢個pizza都做晒功課,
多得JO姐姐嘅提示,
參考埋 Darling's kitchen嘅網誌,
得知好多搓麵粉, 轆pizza皮嘅心得...
搓完麵粉要等一個鐘,
兔寶寶好合作, 較啱時間扭計食奶,
食完奶攪得嚟啱啱好可以轆薄成型等第二次發酵...
D牛油紙我買咗喇!
原來除咗攞嚟墊响底焗食物外,
用兩張夾住嚟轆個粉糰都可以轆到好薄...
又方便...
今次個pizza, 我無用蕃茄來做醬汁,
因為屋企無蕃茄又無茄膏;
上次買咗1L忌廉同埋紫洋蔥未用晒,
反正有大把麵粉, 一於自制白汁意粉醬,
做一個白汁底pizza!!
(題外話: 500ml嘅淡忌廉賣30幾蚊,
1000ml嘅就賣40幾蚊,
200ml賣十幾蚊,
貪心嘅我而家明白點解D人响同等價錢下零願買200ml嘅三合裝,
都唔買一盒1000ml喇!!!
上次整完鬆餅之後, 我日日响度諗點樣用埋佢唔好徙!!!)
咁啱尋日有D本來同隻雞一齊焗嘅粟米,
再切三條腸仔做餡料...
210度焗18分鐘, 加上芝士多焗5分鐘...
真係好薄架, 仲好脆添!
唔好睇佢樣衰衰,
實情係好好食架!
好味過"pizza乞"同"事迫加T house"架!
只恨我個焗爐太細,
食完意猶未盡, 想食多個又要再做一輪功夫,
同等多成個鐘...算啦, 做人要知足呀!
剩下嘅白汁唔會徙,
加水加浸咗嘅瑤柱仔, 同埋少少海鮮菇粟米洋蔥,
襯等緊個pizza焗緊就整個中西fusion忌廉湯,
係瑤柱忌廉湯....哈哈, 死未?!
咁多瑤柱仔做湯底, 個湯點會唔好味?!
今日個pizza嘅賣相有無令大家倒胃口呢?
唔緊要, 為表抱歉,
送上我家美少女化身嘅兔女郎艷照,
仲有好似陽光咁燦爛嘅甜美笑容....
珍藏版嚟, 唔賣嫁!!
祝大家有個愉快週日!!
沒有留言:
張貼留言