芝士脆脆棒

8月14日 星期日  晴

今朝一早起身, 瞓唔著, 就動手整飽飽...

尋日留意到MC實驗室嘅網站, 有晒食譜教埋你點做,
見到呢個芝士脆脆棒....

以前搭地鐵返工, 經過美心都會買包芝士麵包條,
十幾蚊包, 好快俾我一陣風咁食晒...
今次試下自己做, 睇下仲以後洗唔洗出外買...

今次又要多謝blog友JO姐姐, 一路做一路傳授我搓粉技巧,
今次又係好成功呀!
雖然外型醜陋,
造唔倒好工整嘅長棒型,
不過真係好脆好香呀!!

由於我無中根粉, 故食譜我改咗少少,
又加咗黑芝麻一齊搓...
本來諗住剩係落芝士粉,
又心多多加咗D Mozzarella 响其中一盆面包度,
變成雙重芝士脆脆棒...

*******************************************************
今次我用嘅食譜:
高根粉     190g
低根粉       50g
鹽                 5g
糖               10g
依士             5g
牛油           30g
水              150g

做法就同MC實驗室嘅一樣, 只不過我搓粉時已加入黑芝麻,
其中一盆除咗加Parmesan芝士粉外, 還加上撕碎的Mozzarella....

大少一早起身就有新鮮麵包食喇!!!
愈來愈喜歡我的焗爐~~

兔寶寶見我搓包包咁好玩,
又要搓埋一份, 將自己個鼻哥當麵粉咁搓....
結果, 再一次變花面貓, 左邊鼻哥損一撻, 右邊又損一撻,
嗱, 咁咪係好事成"傷" 囉~~

********************************************************