大頭媽媽

11月14日  星期五  晴天

要兼顧事業和兔寶寶, 

好多時都忙到甩碌, 

唔敢想像自己可以參與兔寶寶學校在平日舉行嘅活動,

現時我只要求自己每日陪兔寶寶做功課、

把日頭教嘅野溫習一次.

忙中有錯, 開學無幾耐, 

我已經試過兩次忘了在週三幫兔寶寶著體育衫,

帶錯書漏簽體溫冊呢D, 已經係閒事了...

以往嘅星期五都係大少送兔寶寶返學,
但尋日我就同大少調更, 由我送兔寶寶..
行到去學校門口先醒起, 果日學校放假!
急忙打俾大少叫佢响北角地鐵站等我, 接返兔寶寶..
我都算係烏龍媽媽嘅代表了...

點解學校會無啦啦放假呢?

因為今日係家長日.

其實我一早就知, 就係唔知點解果朝同前一晚較鬧鐘時會醒唔起.

講起家長日, 細個我係好害怕要見家長的, 

因為本人生性比較多口, 

見親家長都一定會被投訴成日上堂傾計....

 今日兔寶寶就好開心喇!

一D都唔洗驚, 事關老師對佢真係有讚無彈, 

而我見佢張評估紙都係好正面同高分嘅,

最低分果欄係"容易生病"...

但都無計, 呢樣野佢同我都控制唔到~

回顧過去咁多個短週, 

有好幾個星期六朝早嘅節目係睇醫生!

尤其入冬之後兔寶寶咳得嚴重咗, 

晚晚都要食藥先瞓得好少少, 

唔係就會狂咳!

不幸之中嘅大幸係佢返咗學之後十分樂意食藥, 

我估佢係見到同學仔上堂有食,

我先無咗餵藥恐懼症咋!