是非精

11月9日  星期日  晴天

近期部電腦唔知係咪太少開, 

成鬼日都龜速, 唔係就hand機, 

都唔知係咪時候又要再換機...

個個人都話小朋友一上幼稚園會好快識講野...

原來係真架..

我亦開始體會一個小朋友每事問, 每事講嘅階段.

以前我會覺得兔寶寶係好文靜嘅,

同其他小朋友一拍埋, 

直頭有少少高雅嘅感覺:

又唔會投拆人, 又唔會講人是非...

宜家?! 哼!

佢會同我講呀邊個邊個上堂俾人鬧,

呀邊個唔食D乜野.

好似今日咁, 幫佢剪指甲時唔小心整親佢少少, 

血都唔流一滴.. 

佢就借勢咋晒型, 

要我不斷抱住佢;

最估唔到嘅係, 

佢竟然同呀嫲以是非mode口吻講我整痛佢!

 

返咗學呢, 學到嘅野真係有好有唔好.
以前佢睇書又或者睇電視都幾專心嘅, 
宜家開始每事問.
睇故事書時我未講完一頁佢就問我第二D野.
睇電視又係咁.
好似今日無線介紹動物飼養員呢個職業, 
人地都明明介紹緊架啦, 
佢係都唔聽, 就嚟問我...
問到我最後忍唔住要講: 
我都唔知呀, 你係咁問, 我都聽唔到人地(電視)講乜!

宜家亦開始認真要佢認中文字了.
佢間學校好得意, 
唔係由一D簡單嘅字開始教起.
我記得以前讀書, 係由人..加一橫係大, 
再响上面加一橫係天咁教.
而兔寶寶老師係教d圍繞佢地身邊嘅野, 
例如一開始就認"書包"、"校服"...
以前我從未要求佢認中文字的, 對兔寶寶是有一點難度.
今天我要板起塊面, 強硬要佢記.
雖然最後佢都唔係花好多時間去記咗, 
但咁迫法, 我真係怕佢會驚咗, 
而且恐怕明天已經忘記了.
唔教佢呢?!
老師又會在手冊上寫低未達標,
真係左右做人難呀!

仲有一樣野係寫字.
之前我又係無迫佢去寫.
一返學就開始畫直線.
老師初時投訴佢好似BB咁用拳頭握筆,
我亦確實話俾老師知我完全無教過佢揸筆嘅姿勢.
呀B都算改得好快喇, 
唔夠一星期佢就識用右手正確握筆,
雖然到宜家偶然還會明知故問我要用邊隻手,
同係咪咁揸(係呀, 我發覺D細路係超鍾意問完又問, 問一百次架)
 但我已好滿意了.
而佢去學Phonics時老師亦要求佢寫字母, 
佢都仲算跟到.

 
如果...每一個小朋友都係大人嘅一面鏡子....
咁我就要反醒一下, 我究竟係咪好鍾意講:"知唔知道呀?!"
呢句說話, 無論兔寶寶係對住人講, 
定自己自言自語, 都慣性變咗口頭禪.
所以我宜家都唔敢同呀B講:"你知唔知道呀?!"
反而係問佢"明唔明白?!"又或者"清唔清楚?!"
兔寶寶, 我都係一番苦心, 
想確的你知道我所講嘅野姐, 你知唔知道呀?!