週一雜記

11月3日  星期一 涼

今日涼咗好多呀,

大家有無好似小丸子咁著多件衫?!

千其唔好似兔寶寶咁, 仲著住件短袖衫呀!

好耐都未試過星期一出blog, 

尋晚十點幾就瞓咗, 今朝四點鐘扎醒就眼光光!

見大少瞓咗响梳化, 就拍醒佢叫佢入返房瞓~

平時我同兔寶寶瞓一間房, 大少瞓細房, 

逢星期五至日大少個仔返嚟瞓就會瞓細房, 

大少就會瞓梳化, 如果佢走入來同我地一齊瞓就三個都瞓唔好!

所以呢, 星期日通常我都會早睡早起, 

都係想大少瞓得好少少咋!!

不過早到四點就醒, 就真係早咗少少, 

睇嚟我好快就可以老人家咁, 

朝早起身晨完運再返工! 

兔寶寶都返咗兩個月學喇, 

亦在不知不覺中, 過咗佢嘅三嵗半生日.

作為一個無工人幫手嘅在職媽媽, 

有時...真係忙到連廁所都唔得閒去, 

仲邊有咁好閒情去記呢D野吖~

話說回來, 本來以為兔寶寶讀咗全日班之後會瘦少少, 

諗住佢自己食無人鑑就會食少D!

但原來, 一群小朋友在無家長陪同下, 

食飯係會食多咗, 食快咗!

學校六點半食晚飯, 

基本上我七點前去到接佢, 

呀B已經食完...玩緊玩具!

返到屋企到我地開飯, 

兔寶寶又再食多一次晚餐~

有時淨係食D菜同魚, 有時可以扒多半碗飯!

再加埋佢返學定時定侯有個多鐘頭午覺, 

好食好瞓下, 雖然呀B可以話係返咁耐學病足咁耐...

(唔係咳就係流鼻水),

但塊面無尖到, 仲圓碌碌咗:D

 

今個週六日除了帶兔寶寶返興趣班, 

都係HEA得就HEA, 

無乜野要特登去做..

少咗留响屋企玩嘅兔寶寶, 

宜家一個人都可以玩好耐, 有時我就由得佢留响屋企玩吓就算了.

由今個星期日開始, 

俾兔寶寶參加多一個科學班.

無諗過要做怪獸家長, 

從來呀B參加呢D興趣小組, 都係以佢開心為大原則.

放學之後我都會問佢玩得開唔開心呀?!

個人覺得, 咁細個去上呢D堂, 

期望佢開心多過期望佢真係學到野...

只係心理上覺得佢上過下堂, 

好過全日都係玩玩玩姐~

唔去學呢學路, 

走去公園玩吓鞦韆, 一樣咁開心~

上完堂去完公園, 

我地仲去咗動漫基地睇展覽, 玩攤位遊戲!

呀B跟住D小朋友一齊參予畫畫, 

畫完之後仲有一袋禮物送!

拋波波...雖然無一個射中, 

但依然有一個印仔加一份小禮物..

玩完又有得食, 

怪不得兔寶寶成日唱: 星期日, 最開心!