西鐵屯門遊
尋日難得大少可以放星期日, 我地返咗屯門同阿媽食飯呢~~
每次返親去都係大少揸車, 佢從來未搭過西鐵呢! 輕鐵更加無搭過.....經過我再三遊說, 仲上埋西鐵個網站check埋去証明俾佢睇, 由九龍去屯門只需33分鐘, 大少終於乖乖就範了.........
事實上, 由我家出門口計, 去到阿士甸站, 即使以龜速步行, 亦只需5分鐘; 更何況我阿媽就住响屯門站隔離; 連大少都話, 真係意想唔到咁快呢~~
每次入到去如果有多時間, 都會帶大少去食一D我小時侯好鍾意幫襯嘅小鋪頭....例如: 我讀嘅小學隔離嘅車仔麵檔, 食鳳爪同豬腸粉; 舊屋附近嘅粥鋪食炸兩; 去錦華商場食炸雞脾等等....一D唔係真係超好食, 但回憶嘅味道係最好嘅野....
今次因為早咗起身, 同埋有個心態係宜家唔去食, 將來帶住兔寶寶就更加難去嘅心態; 我地食咗好多野呢!! 我地都無咩點行街, 反正而家D商場賣嘅衫都差不多, 星期日嘅市廣埸又超多人, 於是我就帶咗大少去行屯門公園了....
小時候去屯門公園都係去餵鴨仔同大金魚.....仲記得D鴨仔好識食, 不太喜歡食麵包; 而要食薯條, 仲要係麥當奴果D薯條呢~ 每次都要叫阿媽或者爸爸買兩大包薯條, 一路餵鴨, 自己一路偷食...
我仲响果度同爸爸踩過水上單車呢!到而家有十幾年無去過了...入到去, 變化真大呢!
我記得以前係無欄杆圍住個人工湖嫁; 點解咁多人响度唱歌跳舞?!! 好嘈呀~~
D鴨仔呢?? D鴨仔無晒嘅??!! 水上單車都無埋........睇真D, 個湖少咗好多大金魚呀........
好失望呀.....同回憶差太遠了...反而係從來未嚟過嘅大少, 覺得好新奇, 佢仲話有D似大陸D公園....佢仲好欣賞响果度唱歌D人嘅歌聲tim~~ 真係俾佢吹漲.....
咁唯有去D我都未去過嘅地方: 爬蟲館. 都幾多野睇呢~~
呢隻叫"眼鏡凱門鱷", 本來哩埋咗, 係大少撩佢出嚟嘅呢~
呢個我地睇咗好耐先知係有條大蛇响個箱入面呢!
呢個爬蟲館, 最好玩嘅遊戲係同大少鬥快搵出箱入面嘅動物; 因為佢地D保護色同四周環境好似, 同埋佢地好鍾意吊住/貼埋一二面, 真係幾難發現佢哋!! 大少最後結論係: 佢絕對不宜一條友行樹林! 如果唔係俾咩生物溶咗佢都唔知!
附上大少同大烏龜的合照一張:
沒有留言:
張貼留言