試用法包粉整法包

12 月1 日  星期四  陰天

尋晚試吓用法包粉整法包,
材料份量用返包法包粉上嘅指示,
不過我見有袋七穀粉剩返少少唔三唔四,
所以溝埋落去代替少部份高筋粉.

材料:
法包粉: 50克
高筋粉: 150克
即用酵母: 半茶匙
水: 120克

做法參考: Alice's Kitchen: 層層疊小法包

參考埋其他blogger嘅做法, 我額外加咗半茶匙鹽調味.
尋晚開始轉涼, 我就懶醒咁放咗個麵糰入去飯煲入面,
keep warm 咁諗住暖住佢會發得好D,
點知個飯煲太熱, 90分鐘後我發覺麵糰表面乾咗...
(後來JO姐姐教我可以噴少少水等佢濕潤返...)
第一次發酵係發架喎!
但之後第二次同最後發酵都無再發,
我都打定輸數D酵母可能俾個飯煲熱死咗,
夜媽媽無咩心機繼續焗埋落去,
將麵糰整形之後就包好放入雪櫃,
第二朝先再算啦!

今朝攞返個麵糰放室溫約一個鐘先焗,
焗嘅時候都無乜點漲大.
都預咗焗完出嚟變"掟死狗"麵包...
不過焗完出來又唔係好硬咋喎!
個皮仲有少少脆,
係硬中帶脆果隻!
唔係話好好食, 至少我知道大少一定唔會食,
至少都入到口, 做出來兩個包俾我食吓食吓食鬼晒LU!

*******************************************************************

兔寶寶: 掟死狗麵包?! 係咪掟我?! "喱"埋先!!

兔寶寶: 唔係掟我嘛?! 咁我放心出嚟食條蕉...
             哎呀! 唔記得剝皮添!!

兔寶寶: 嘻嘻, 攪吓氣氛姐, 我知道食蕉要剝皮嘅!!