重陽節午餐 * 兔寶寶識轉身喇!!!

10月5日  重陽節 陰天

今日重陽節假期,
紅日我地好少出去食晏,
唔洗同人迫又唔怕俾人收貴D!!
响屋企煮下飯仔啦~~
尋日用豉油, 鹽, 薑汁同雞粉略略醃一醃雞鎚仔先,
聽blog友Flora教路,
界一刀先醃, 入味D!

煮之前兩三個鐘,
加咗包唔係香港製造嘅"你緊記"--蜜汁蒜香骨醬,
醃佢幾個鐘, 咁唔怕唔入味喇掛?!
跟住用200度焗30分鐘,
取出反一反身再焗多20分鐘...
我仲加多支粟米一齊焗添~~

我又發揮慳家C9嘅本領,
同一時間响下層焗埋薯餅...

仲有用錫紙包住一包金菇來焗, 加埋少少牛油, 好香呀,
不過包金菇唔記得影相...

仲响街市餅乾檔買咗10蚊齋老味,
係檔口自家製嫁~~
影相時已經食咗D...

*********************************************************************************************

兔寶寶: 我識轉身LU...., 而家仲嘗試埋用兩隻手支撐上半身,
好似青蛙咁坐添~~

坐得唔耐架, 好快就好似一個大冬瓜咁,
"中"咗落地架喇~~

我仲專登整蠱媽咪,
响佢睇唔倒嘅情況下先翻身,
等佢影唔倒相!!
佢一望住我, 我就眼定定咁望住佢,
郁都唔郁, 激到佢扎扎跳呀!! 哈哈!!

嘻嘻, 其實我同媽咪玩下姐!
媽咪咁鍚我, 我又點捨得激媽咪吖~~
我仲好痴媽咪添呀!!
就尋日咋嘛, daddy抱我一陣間,
我就即刻大喊兼尖叫,
攪到成街D人都望住daddy...
媽咪一抱返我即刻笑呀!!
佢即刻覺得自己地位超然添呀!
哈哈, 我都話我好醒目架啦!!
耐唔耐要擦下媽咪鞋, 氹下佢開心嘅...