爆芝豆腐鬆餅(無油)

7月11日 星期三  晴天

好耐無焗蛋糕喇!
因為大少成日都話減肥,
無咗一個最大嘅幫手食,
我都無乜癮走去開焗爐....

今次整呢個爆芝豆腐鬆餅,
完全係因為響應環保(哈哈, 有藉口為食就真..)
點環保法呢?! 一陣先講..



今次呢個鬆餅我用咗半盒豆腐(無豆腐可以用南瓜泥, 香蕉泥, 蕃薯泥等等) + 120克麵粉 + 半茶匙發粉 + 2隻蛋,
再加適量豆漿(或牛奶, 甚至水).
總之係好似好濕嘅麵糰咁(即係你搓又搓唔起, 但又係固體嘅狀態)就OK喇,
覺得太稀時又再加咗D麥皮落去, 我就大約加咗4湯匙麥皮,
當然要加D糖啦, 我加好少咋, 大約係2湯匙咁,
所以食起上嚟唔係好甜架咋!
我又加咗D阿麻子落去做裝飾, 最後加入2片卡夫芝士(先撕碎),
(加埋少量溶牛油會香D, 我無加到.)
全部材料攪拌成漿,
 咁就可以放入兜仔度,
用160度焗25-30分鐘至金黃色喇!

至於點解話呢個係環保鬆餅呢?
大家係咪估D豆腐係食淨呢?!
嘻嘻! 等我開估啦!
留意下鬆餅嘅白色嘅鬆餅容器,
係食完藍罐曲奇剩返果D紙兜仔嚟架!
係咪夠晒廢物利用呢!
一個紙兜仔唔夠力去承托D蛋糕漿,
可以用幾個疊起!

整咗六個曲奇紙兜兜鬆餅,
個焗盤唔夠位,
於是用返普通鬆餅杯, 整咗兩杯...

今次嘅鬆餅雖然落少咗糖唔係好夠甜,
不過豆腐嘅香味就突出咗,
呀媽同兔寶寶都好鍾意呢!