栗子忌廉千層蛋糕

7月6日  星期五  晴天

星期一晚食完團購餐,
我地呢兩個大胃王其實都唔多夠飽...
好在前一日因為要用埋盒淡忌廉而整咗一個栗子忌廉千層蛋糕.



今次嘅pancake皮粉漿用橄欖油代替牛油(想健康D),
又用咗水來代替牛奶(啱啱盒奶飲晒),
加上分咗心無攪拌得咁好, D麵粉攪到一舊舊咁,
最後要放入攪拌機攪返勻佢.
可能係因為咁, 今次嘅pancake漿好瀉身,
其實只要加多少少麵粉入去可以解決到, 我又懶得再摷返包麵粉出來...
所以今次D pancake皮比較薄, 大力少少都穿...
本來諗住學FLORA咁整得靚靚仔仔最後都係放棄咗,
又係求其是但咁疊埋一齊就算喇!

今次係第二次做栗子忌廉, 又係比上次偷工減料...
一分耕耘 一分收穫,
無自己煮淋栗子, 改用現成嘅即食栗子,
味道係差好遠!
雖然時間係慳咗至少五倍(仲要係未計烚栗子嘅時間!),
不過下次我都係會自己烚栗子!


由於我D淡忌廉只剩下大幾二百幾ml咁上下,
所以搽cream都要慳住來搽!
每層之間都唔係好多cream架咋!

今次呢一個蛋糕雖然係無上次果個咁好食(其實食味都唔差, 只係有比較下差咗),
不過大少都食咗兩大件架!

兔寶寶: 快D俾我食! 快D! 我要食!