又是大少煮

12月7日  星期五  寒冷

尋晚果餐又係大少煮...
係呀, 佢都係一煲過烚,
今次佢帶埋兔寶寶去街市,
買咗兩斤蜆, 一斤蝦, 斤半菜芯, 仲有三包金菇, 一條黃芽白...仲有一梳蕉...
買完野, 佢返嚟同我講,
話終於知平時我一個的住個B走落街買餸有幾辛苦,
仲話以後佢會早D起身, 幫我落去買餸...
雖然唔知佢做唔做得到, 但至少佢有咁嘅心,
我已經好感動了...今次真係病得抵呀!

不過大少買餸真係唔多識"格價"...
佢買返來D菜...有很多都是爛的,
還要買得頗貴;
平時我買十蚊三包金菇, 佢要買廿蚊三包...
但人地做埋買埋呢, 又唔可以怨得咁多喇...
始終佢唔係師奶, 唔識精打細算...

呢一餐食嘅野雖然係同前一晚差不多,
但係大少難能可貴的一餐,
實在要好好記錄.

呢一餐同前晚果餐差不多,
都是烚烚烚...有烚大蜆...

有淥米粉...不過呀B到宜家都係唔食米粉嘅,
蜆又唔敢俾佢食...

佢呢餐食蝦飽!
所以呢, 我地都覺得下次要買斤半蝦了...

仲有淥菜心, 原來大少係無一條條洗的,
浸過一次水就淥了...
好彩食完無再肚疼咋!

之後大少猛問我支通渠佬放咗响邊...
原來...佢洗野時把D垃圾直接倒在升盤裡...
條喉淤塞了...
於是大少就渠王上身...
通渠時, 更可怕的事情發生了,
大少發現每吸一下, 洗衣機果個位都有污水排出來..
我幾驚會發生污水爆發事件, 浸埋個洗衣機,
甚至成個廚房架...
大少最後仲要搬開部洗衣機視察..
那一刻我真是覺得...
男人真係唔應該入廚房架..
好彩攪條渠攪咗接近一小時, 終於整返好了.

因為我慣咗晚上吃好多菜, 食完呢餐,
我地再走去惠康, 買咗兩個西生菜來,,
見到大大個西生菜兩個都只係賣$8.8,
大少即時呻笨, 因為佢買菜真係買得好貴呀!

返屋企大少又即時淥多一個西生菜俾我食...
煮完出來, 仲好高興同我講,
佢呢個大廚煮咗"一菜兩味"...
我用筷子一夾, 頂吖, D菜"痴"住嘅...
原來大少只係成個西生菜放入個煲度滾!
怪不得我一看就覺得D菜係未熟的.
由於佢係無遂塊葉搣出來洗, 我就遂塊搣出來驗屍咁驗...
眼利的我, 發覺大少果碗有不少蟲蛋痴著...
最後, 當然係成碗唔食得!
我當然忍不住哦了大少兩句..
但我見佢樣子怪可憐的, 又好似好無辜咁,
又忍著不說他...

還有半個完整的生菜,
最後由我煮, 我們的宵夜....

又是米粉, 生菜煮金菇, 還有大少在廚房找到的即食海哲.