大熱高湯麵 -- 兒童不宜

12月27日  星期四  和暖

上個星期六, 兔寶寶舅父到灣仔做body check,
攪掂晒之後帶咗我同呀B去北角的"大熱高湯麵"吃午餐...
店方標榜以傳統技巧製作老火高湯的，
絕不使用味精、雞粉或其他添加劑，熬製出三款純正高湯作為湯麵的靈魂湯底.


店子很小, 四人枱數埋不夠十張,
可能價錢算不上便宜,
我們在LUNCH TIME吃也只有數張枱有客人.
侍應仲多過客呢!
除咗吃麵, 那兒還有九款點心供應,
小小的一籠, 大約只有一個飯碗的大小,
就算一個人吃數籠也不會飽的,
目的是讓客人多試幾款吧!

店方提供了一個二人餐($198),
包括了全部九款點心,
再加多兩碗麵和飲品.
由此可以想像點心的size是多麼細小呀!
可惜有些點心唔啱心水(好像豬頸肉...),
於是我們叫了兩個單人餐.
每個餐跟一碗麵和三款點心...
我要了黑高湯葛粉絲..
黑高湯是以牛骨熬成的..
葛粉絲就似薯粉, 也有點似韓國粉絲.


跟三個點心, 有一個架是專放點心的.
我們要了竹笙金腿百花卷、馥郁糖心蛋和三鮮水餃.

舅父要招牌大熱高湯麵.

跟酸梅脆蝦丸、 脆炸鯪魚角、芥未炸墨魚球;
另外我們再散叫了紅燒蘿蔔牛腩,
這就試勻了我們想吃的點心了...

這兒的麵和點心都OK好吃,
吃得出店方是有心思去煮的,
但又不是驚為天人的美食,
除了牛腩外, 沒有什麼是我想一吃再吃的...

因為份量不多, 而且我們都肚餓,
我們叫多一個餐, 今次要白高湯米線,
白高湯即是魚湯.

今次跟兩個點心就夠了(套餐可以跟兩個或三個點心, 當然價錢是不同啦!)
呀哥想encore多次糖心蛋,
而我就想試下XO醬辣味牛腩(無影相).

兩個大人加一個BB埋單收$250,
午餐來說絕對不便宜,
但服務態度卻奇差.
那兒的侍應大部份都是小妹妹, 其實招呼也過得去,
至小看到兔寶寶會遞上水, 而不是茶.
但那個應該是呀頭的呀姐, 可能本身不太喜歡小朋友吧!
兔寶寶在我們看餐牌(即是墊枱紙)時把她自己那張拎去玩,
之後又搶了我那張...於是我就從後面張吉枱拿起一張墊枱紙來看,
很自然看完就把它墊到自己的位置上.
那個短髮呀姐卻走過來, 取走張紙,
並把兔寶寶已弄皺的墊枱紙攤開, 放在我個位上.
又大聲地吩咐下屬"唔洗俾餐具BB架!"
OK你環保, 我受你, 可你D態度可唔可以好D?
不說話黑口黑面的, 令人難受.

咁都未夠, 吃到中途兔寶寶不小心把碗打爛了..
我們都有說對不起啦,
這個黑口黑面的呀姐走過來,
以非常不友善的語氣叫我們不要俾隻陶瓷碗呀B用...
OK, 係我理虧, 係我打爛野..
咁我問佢: 有無膠碗呀呢度?
佢做出一稚非常討厭的眼神,
可能她認為我咁問非常幼稚, 影衰佢間鋪吧?
她說: 呢度係絕對無膠碗的...
她回答的呢句說話無問題,
但她的面部表情、語氣同態度就真係令人覺得很難堪,
特別是她的眼神, 令人看見了就即時覺得自己很(被人)厭惡..
我明白, 小店子未必歡迎百厭的小童,
呢個呀姐可能天生就討厭小朋友,
我家兔寶寶也不是這麼的人見人愛...
我都不想做怪獸家長,
強迫每個人都我個女好...
可是作為一間食肆的管理層,
服務態度應當好一點吧!
再說我們三個人叫三個餐, 兔寶寶都算是一個客人吧!
兔寶寶之前未試過打爛碗, 去酒樓都用慣陶瓷碗的,
佢又唔係故意打爛...
假如係一個大人打爛隻碗, 呢個呀姐嘅應度會唔會一樣呢?
有時去D食肆, 因為人手不足客人又多,
侍應都忙到甩LOOK咁滯, 服務不週是可以體諒的;
我也不是一個要求高的人.
但那天客人不多, 個個侍應都悠悠閒閒的,
我就唔明點解個呀姐咁"屈雷鎚"了..經常出外用膳的我, 從來未遇過態度咁差的服務員...
我們快手快腳吃完午餐就走了..
故此呢間鋪雖然有其特色,
但有小朋友的你, 我就勸你們不要去了.