細路仔病毒

8月9日  星期五  晴天

早排兔寶寶咪病咗嘅,
佢好返之後就輪到我病喇~
以前睇過套爛鬼港產片入面有一樣生化武器叫"細路仔病毒",
原來呢樣野真係唔講得少!
以前我都好少病架, 病就最多夜晚食一次幸X傷風素就攪掂;
唔想認自己老咗抵抗力無咁好,
就唯有話呀B的病菌真係太厲害了!

幸好兔寶寶都算乖,
朝早食咗藥我迷迷糊糊之制只係見佢出廳玩個美女廚房,
肚餓口渴又識自己"擔"櫈仔拎水飲摷野食...
係, 佢襯我唔為意就爬上我張床上食麵包囉~
最唔想嘅事真係發生咗...佢响張床上面撕碎D麵包嚟玩!
到我發現果時, 已經成床都係麵包屑...
真係想C呀, 當時嘅身體狀態根本唔容許我換床單.
所以呢, 我地呢D無工人又無四大長老幫手嘅,
千其唔好病!

到晏晝大少醒咗都帶咗呀B落去食野,
但回來我發現兔寶寶仲著住長袖衫, 再加一條燈心絨褲...
無媽的孩子像棵草!
大少仲買埋外賣俾我....
竟然係: 炸脾薯條!
大少, 我係病咗, 唔係有咗呀~~
我寧願食一碗白飯, 再唔係一個饅頭都好吖~

聞到陣油炸味已經唔想食,
結果又益埋兔寶寶, 佢都係第一次食咁大隻雞脾!
呢D垃圾食物, 一餐半餐將就吓啦!


當日我全日嘅食糧, 好耐無飲過嘅葡萄適!
兔寶寶仲成日心思思想同我爭飲!

幸好到黃昏時間好返D,
可以幫自己同兔寶寶沖涼...
仲勉勉強強洗埋衫、用個除塵碌碌吓張床、仲抺埋地添!

當晚我就同兔寶寶瞓另一張床啦..
大少可能知無乾淨床佢瞓, 竟然閃咗返大陸按摩!
怪不得咁好買雞脾我食啦~