兔寶寶35週5 產檢
今日返去QE做產檢, 首先去急証室果邊做入院手續, 之後再去日間產科果邊...唔知係咪下午嘅關係, 等都唔洗等, 我連麵包都食唔切, 姑娘就帶咗我去聽胎心室....大少唔入得去, 响出面等...
之後姑娘响我個肚到搽D gel, 同我我駁儀器, 我就好清楚聽到兔寶寶心跳....我一乸起件衫, 佢就問我: "醫生係咪話你BB太細粒呀??"
睇嚟兔寶寶真係好細粒呀...然後佢叫我BB一郁就按制...成個聽胎心嘅過程要30分鐘.
果度張梳化好舒服, 聽住兔寶寶心跳, 我覺得好有安全感...原來唔係BB聽到媽媽心跳先有安全感, 我聽到BB心跳, 我好放心佢仲活著, 我都好有安全感呀! 舒服到幾乎瞓著咁滯....
跟住姑娘走入嚟check, 發現BB無咩點郁, 佢就幫我按摩吓個肚...無耐有另一個孕婦嚟到駁另一部儀器, 可能兔寶寶聽到另外一個BB嘅心跳聲, 兔寶寶終於醒喇....姑娘話可能BB啱啱瞓咗喎....30分鐘左右就可以走得去照超聲波了...
有 一個實習同一個女醫生同我照超聲波, 主要係度BB頭圍, 肚圍同埋大腿骨...大少又問多次醫生BB係男嬰定係女嬰....已經照過好多次, 都係話係BB女嚟嫁啦~ 不過因為大少同佢前妻所生嘅兩個子女, 都係照錯咗, 明明係女仔照咗係男仔, 明明係男仔又話係女仔, 所以大少每次照都要問一問. 同埋佢見我買親D衫俾兔寶寶, 都係買粉紅色, 已經開始EE哦哦, 又叫我唔好再買裙仔喇~
算吧啦, 有一次大少無陪我去照, 果時胎兒唔係好大, 咁啱兩隻腳分得好開, 個醫生仲同我講, 呢度係BB陰道, 果度係陰唇tim....大少唔信都無辦法...呢兩次照, BB size有番咁上下大, 兩隻腳夾實咗, 已經睇唔到性別了....今 次度BB 嘅大小都係偏細, BB只有2KG, 醫生特別強調肚圍係細咗, 同埋胎水偏少; 不過佢話都係响可以接受嘅水平....跟住個醫生話之前聽胎心嘅時候, BB好似啱啱瞓著咗, check唔真, 要check多一次....同埋安排我下週都要再照多次Ultrasound; 佢又問我之前有無覺得自己穿過水?!
吓?!
個醫生就話安排埋我check....坦白講, 佢話我BB偏細, 我都唔係太擔心, 因為無論我, 兔寶寶婆婆, 舅父成個母系, 都係輕飄飄的; 但懷疑我穿咗水, 我就真係驚....好似要即刻入院催生嫁!
之後又要入返去聽胎心室聽多次BB心跳, 我預先同大少講, 叫佢幫我去日間醫療中心果面攞藥先, 慳返D時間, 反正佢入唔到嚟. 今次檢查, 個姑娘又話BB郁得幾好, 30分鐘就攪掂check完喇~
好快D姑娘同醫生又安排咗另一個房間去檢查有無穿水, 大少都剛剛攞完藥返嚟, 陪我一齊入房檢查. 做親呢D檢查, 最驚就係個醫生搵個鉗塞入去....佢叫我大力D咳, 睇下有無羊水流出, 同埋攞咗D分泌去化驗. 初步檢查係無穿水嘅...
跟住攞埋D覆診紙, 就走得Lu.......
沒有留言:
張貼留言