隔夜餸 v.s. 快手快腳半西餐

3月24日  星期日  晴天

之前上兔寶寶嫲嫲屋企食飯,
原來呀嫲除咗畢起一大壺湯同一小碗雪菜肉絲俾我之外,
佢仲留起咗幾舊魷魚俾我!
第二日我就用D魷魚來炒咗個椰菜喇~



雪菜肉絲呢, 我就加咗幾隻蛋,
炒埋又一碟.

全部都係隔夜餸演變出來,
好彩大少無咋型姐~
呢餐無煮飯, 食蝦子麵咋!
清清地無乜肉, 一滴額外嘅鹽都無加過,
當清腸胃啦!


********************

前日行百佳, 見到呢盒意式芝士雲吞,
28号夠期, 由60幾蚊減價去到廿幾蚊, 即買!


星期六兔寶寶一早要interview,
面試完一家三口齊齊補瞓多一覺,
起身時已經接近下午三點!
大少趕住要返工, 呢餐唔洗三個字攪掂喇!
原來D意式雲吞好方便, 只需用滾水煮三分鐘,
我再加咗半罐脫脂周打蜆忌廉湯做汁.
因為唔夠時間, 無再加芝士放入焗爐焗呀!

煮雲吞嘅同時煮埋個煙鴨胸香草直通粉,
呢一味需時七分鐘...

午睡之前浸洗定D菜,
好快手又一碟..