Ugly Chocolate Cake

12月21日  星期三  寒冷

多謝大家對我呀媽嘅關心同埋祝福呀!
食咗西藥同打咗針,
我媽隻腳已經無咁痛,
至少行路唔會一拐拐咁.
不過佢唔多食得西藥,
又可能藥性太強, 副作用都好勁,
我媽出現暈眩同埋嘔心嘅情況,
食乜嘔乜, 精神仲衰入急症室果日.
睇見佢咁我都好心痛,
話晒佢有呢個痛症唔多唔少都係因為照顧我地得來的,
唔係我地佢都唔洗咁勞碌啦!
所以我真係希望佢快D好返,
快D可以做返一D佢鍾意做嘅野,
咁我先會安樂少少...

尋晚我媽都係响我地度瞓.
雖然我家很細, 但佢响我屋企我可以保証佢唔會郁動先!
佢返屋企就會攪呢樣攪果樣,
不停搵家務來做, 好似唔俾自己一刻空閒咁.
(佢就算口話會休息, 但我知道只要佢响屋企,
佢一定會搵D野來做囉!)
响我度至少唔洗煩三餐先啦!

***************************************


呢個蛋糕係我上星期五焗架!
 之前焗過一次,
上次無睇火焗燶咗, 完全失敗.
今次跟另一個食譜,
小心留意爐火,
個面差不多時就加張錫紙上去蓋面.

呢個蛋糕係唔需要用麵粉的,
材料只係朱古力, 牛油, 雞蛋同糖.
因為無麵粉少了支撐, 個蛋糕脫模後下陷,
賣相真係麻麻地...

雖然樣衰, 但真係好好食.
點好食法呢?
一出爐我忍唔住食咗半個!
平時我自己做嘅蛋糕,
尤其係呢D又牛油又朱古力嘅甜品,
我都好忍到口只係食少少,
好少會失控一食就半個咁嚟!
再加上剩餘嘅半個我媽同呀哥試咗都話好食,
(因為太ugly, 大少唔肯食...)
連平時唔多食甜品嘅呀哥都話呢個甜品下次可以encore,
真係.......糕不可以貌相呀!!

食譜參考: 小本廚房實錄--無粉巧克力蛋糕
(糖及牛油減少至50克)

*************************************

想知呢個蛋糕有幾好食??
睇吓兔寶寶食完之後嘅反應...
超攪笑(作為媽媽嘅我覺得啦!!)