父親節快樂!!
今日父親節, 一早我就俾大少享受吓一拖三嘅樂趣,
由佢一個帶住三個小朋友一齊行海港城.
臨出門口時我叫大少攞埋一盒芒果布甸出去俾D小朋友食.
而我就偷得浮生半一閒, 出去做個facial!!
扮完靚靚先join返佢地!!
醒起早前買咗迪士尼樂園團購嘅入場卷係要响星光行換定飛,
反正果間禮品換領中心星期日都開, 而且只係响海港城隔離,
於是就一個人上去換埋飛先.
好彩係我一個上去咋!
星期日熄咗中央冷氣, 但又有成二三十人等換飛,
响條走廊排隊真係熱到飛起!!
之後响玩具反斗城搵返大少佢地,
見到面我多口問句: "D芒果布甸食唔食得晒呀?"
點知原來大少唔記得咗盒布甸!
好彩我用個冰袋入住, 仲未溶咋!!
之後又係四圍遊下, 星期日加上父親節,
真係人多(BB)車又多...
今日無影全家幅, 係影咗D散收收嘅相...
哥哥同姐姐都好熱衷於教兔寶寶行路...
立正!
大人行大門, BB行BB門...
之後出咗去海皮果面搵地方玩咗一陣打羽毛球,
因為太熱, 又行返入商場...
直至六點幾七點, 哥哥姐姐有下場節目,
就送佢地撘地鐵返北角, 而我地就約咗呀哥出深水埗睇相機.
結果呀哥買咗一部, 而我地就打唔定主意,
無買到!
睇完相機天已黑, 個個趕返屋企,
於是行去西九龍廣場求其食D野,
去咗一間叫牛車水, 以為係食豉油西餐嘅,
原來選擇都幾多, 仲有中式小菜嗌.
叫咗個三人套餐, 一人揀一個餸,
我揀粟米斑塊, 麻麻地, 炸得乾咗D..
大少要沙嗲金菇肥牛煲, 呢個好食.
呀哥揀白飯魚煎蛋, 好耐無食白飯魚, 又幾好味啵!
跟餐可揀例湯、西湖牛肉羹同粟米雞茸羹,
我地揀西湖牛肉羹, 雖然唔多料都叫俾想像中好,
飲剩D先記得影相...
散叫多一碟椒絲腐乳炒通菜, 都幾好, 夠味得來唔油膩.
有人成餐飯都好曳, 不停用匙羹敲隻碗...
連埋白飯四個, 四杯野飲, 埋單都係二百二十蚊左右.
食完野, 又係特訓時間!
今次兔寶寶同舅父玩接力!!
兔寶寶都好開心自己又叻多一點點,
努力呀, 離成功不遠喇!!
舅父你係得嘅!!
沒有留言:
張貼留言