返娘家做節

9月26日  星期三  晴天

兔寶寶: HELLO! 又係我冬菇頭D相呀!

星期一果日, 我地又返咗屯門,
預早同屋企人做節!
其實前兩個星期一, 我地已經同咗爸爸和叔叔佢地食飯做節架喇,
只不過當時人太多, 我就不好意思影相了.

入到屯門係下午茶時間, 呀爸呀媽忙於行山唔出嚟飲茶,
所以我地都係求其搵D野食就算!
去開華都商場買滑鼠, 見到間"金滿軒",
記起chumama曾經介紹過, 咁就走入去試下.

我一望餐牌就拿定主意,
要了酸辣湯雲吞配高力豆沙.

酸辣湯大大碗很足料, 唔會水汪汪;
雲吞在湯裡只屬配角, 也有四大粒.
平時不喝湯的大少也喝了我很多酸辣湯...
高力豆沙係等埋其他枱嘅單一齊炸,
雖然要等, 但送來時熱辣辣呢!

大少要了牛肉(其實是牛展來的)擔擔麵配窩貼,
佢話窩貼很好味喎!



本來兔寶寶瞓到好似中咗槍咁...

聞到食物香味就彈起身,
食咗大少半碗用水洗過的擔擔麵...

呢一餐連每位三蚊茶錢, 不設加一,
埋單六十幾蚊咋!

******************

食完野行一陣就行去公公屋企LU!

上到去坐咗陣, 我同大少就交低兔寶寶俾公公照顧,
我地落咗去附近商場行街街.
返到屋企呀公話兔寶寶唔扭計好乖乖,
自己同自己玩都好開心.


呢一餐大少開頭話靠唔住呀~
皆因我媽已經有兩年無下廚,
平時佢地餐餐都出去食!
雪櫃除咗放汽水之外, 都係吉架!
點解呢?!
因為呀媽試過幾次唔記得熄火就出咗街差點火燭!
咁我老豆就落order, 以後都唔好煮飯喇!
真係嘥晒, 其實我媽煮野係好好食架!

兩年無煮飯, 屋企連石油氣爐都丟埋,
要用電爐慢慢煮!

屋企無BB櫈,
呀媽就想出這個座位給兔寶寶...
放心! BB係用我條絲巾綁住架!

飯前先飲紅蘿蔔佛手瓜湯.

呀哥果日提早放工,
專登轉車走入葵芳嘅"奇香雞",
買了一隻蔥油雞.

還有半隻燒鴨.

呀媽果朝就去咗艇家度買魚,
呢條石斑兩斤重, 唔係養魚, 係野生架!
為咗呢條魚老豆仲叫我地上嚟果陣買支靚豉油添~
 


仲有海蝦一斤.

仲有烚生菜無影呀!
連飯都無煮, 唔夠飽食饅頭...
雖然唔係好多碟, 但碟碟大件頭又好味,
大少由頭帶到落尾,
一共飲咗一二三四...四罐ZERO可樂!

兔寶寶食咗很多魚和大約半條栗米.

自己拎住食, 唔洗我遂粒"搣"出來.

食完飯, 兔寶寶襯大人忙於食生果之際,
偷偷走入廚房.
在我家有度安全閘欄住廚房,
BB常常"望閘輕嘆',
嚟到呀婆屋企, 佢仲唔借機閃入廚房遊覽吓咩~

到我媽打開雪櫃執野時佢仲開心,
一個屈尾十捐入去摷野!
又難怪嘅, 雪櫃喎! 佢"恨"咗幾耐呀~~
其實佢一路食飯對眼都一路盯住隔離個廚房架喇~

後尾舅父在廚房洗碗時,
兔寶寶不斷咋咋啼走入去, 又走返出嚟;
跟住又攞起舊門塞.........扮...講電話...

玩玩吓自己跌倒响度喊,
但我家規矩係細路仔跌底要自己起返身嘅,
兔寶寶喊多兩喊見無人SO佢,
竟然格格笑兩聲起身, 扮野叻得佢吖~