是日午餐: 鹵水去皮雞、鹵水豆腐、鹵水蛋

2012年5月9日  星期三  炎熱

平時自己整燒雞都會用廚剪把多餘的肥膏和皮去掉.
有一次同大少講起, 佢問我仲問唔全部皮起晒佢出來?!
我話完全無皮唔得架, 一定要有層皮包住去烤隻雞先唔會乾.
但我諗吓諗吓大少嘅提議都唔係完全不可行,
唔整燒雞整鹵水, 用最細火慢慢浸熟,
咁應該無皮都唔會太乾!


起咗皮成煲鹵水汁當堂少咗上面層肥油,
浸埋豆腐同蛋都索少好多油!
剝咗皮賣相一定唔好睇,
但用慢火浸真係唔鞋仲好滑添!
當然啦雞翼同大脾好薄嘅皮我無剪晒,
唔多唔少都有少少油架!

雞胸都唔鞋!

豆腐後期加入去浸,
尋晚整定今日先食,
好入味.
兔寶寶都有份食蛋黃!

呢兩日開始好熱, 但我堅持每日要有至少四個鐘頭唔開冷氣!
我想兔寶寶明白, 我地係有夏天嘅!
唔想佢將來去到無冷氣嘅地方一陣都唔捱得!
而且早排日開夜開冷氣, 可能太乾嘅關係,
兔寶寶嘅手腳關節都出咗D濕疹!
其實BB仔並唔覺得出汗好辛苦, 反而係大人唔受得!
大少就不斷遊說我開冷氣(我已經係等佢返咗工先熄冷氣了 )
我就希望堅持成個夏天, 每天有幾小時淨係開風扇,
(當然啦, 如果BB出熱痱我是會放棄的!)
環環保, 出出汗, 吸吸新鮮空氣!