花生醬瑞士卷

5月10日  星期四  炎熱

好耐無整蛋卷喇!
尋晚見有小小時間,
整咗個花生醬瑞士卷.
就係太耐無整, 失咗手呀!

早咗少少由個焗爐攞片蛋糕出來,
只係啱啱夠熟!
太軟身喇! 雖然用毛巾卷, 都係裂咗!!

唔理喇, 照搽filling, 博佢卷起唔多覺!
餡料係甜忌廉加花生醬.



兔寶寶呢輪好似玩瘦身咁,
食粥仔好食飯仔好, 都係食幾匙就算,
係用手攞住嘅食物食多少少.
我見佢成日搶我隻匙羹來玩,
攞實隻羹掂吓碗裡的食物, 跟住放入口,
原來佢想自己畢呀!

可惜我教極佢佢都係掉轉隻羹來畢,
用隻匙羹底來畢食物, 咁梗係畢唔倒啦!
人地係食碗面反碗底, 佢係食羹底反羹面呀!

兔寶寶: 即係我完全無做二五嘅特質啦!

********************************************

呢條卷蛋因為好軟好濕, 黏性較強,
俾兔寶寶自己叉住食就好perfect!
即使佢攞住支叉fing來fing去, 又或者只係"吉"住少少都無咁易跌.
今早俾咗一片無乜cream嘅頭頭尾尾佢食,
第一啖我"吉"俾佢, 佢唔肯食,
俾支叉佢自己吉就成片蛋糕食晒!

兔寶寶: 蛋糕好味道!!!