北上鬆鬆腿----第一天

10月10日  星期三  晴天

兔寶寶: HI! 大家好! 我地返嚟喇~


星期一朝頭早, 我地响茶餐廳食完個早餐之後,
就搭西鐵轉火車去羅湖喇~

去到羅湖火車站, 諗住慳錢就搭地鐵去東門,
點知好多好多人响地鐵站排隊買飛,
大少貪方便唔洗排隊買飛就買咗兩張大陸八達通.
條數仲貴過搭的士添!

去到東門, 因為BB瞓著咗覺,
於是我地走入百佳行吓,
買咗一大袋零食,
直到兔寶寶醒咗,
先去咗一間港式茶餐廳食LUNCH.

前後要咗兩碗淨雲吞, 因為D雲吞好好食呀~
仲有一碟粟米腸, 同一碟無影相嘅牛肉片腸.
等食期間我仲開咗一杯"老酸乳"俾BB吃,
點知兔寶寶試都唔試吓, 咁就成杯益咗我.


兔寶寶對食完隻杯有興趣D!

好彩佢都肯食吓D腸粉同淨雲吞.

之後我地就行咗去東門, 大少去剪頭髮,
真係俾佢激C我,
叫咗佢唔好剪BB的頭髮, 留返俾我剪,
點知佢都仲要响我行開咗嘅時候叫人幫兔寶寶剪,
話修一修佢喎!
點知剪完好似個男仔咁,
之後果幾日不停有人問我BB係男定女,
呢條問題已經好耐無人問過!
錯過了自己個女第一次正式剪頭髮嘅時刻, 心裡非常不舒服.而大少一幅相都無留底,
仲同我繪聲繪影地描述兔寶寶剪頭髮時好似個大人咁坐定定,
叫我憑空想像當時情況!
為咗呢件事我"鵝"咗大少好多日架喇!


之後行多一陣到下午四五點, 就搭的士去按摩院.
兔寶寶跟大少去男更衣室內嘅按摩池度玩.
而我就自己沖涼洗頭.
之後我地就按腳喇! 而兔寶寶就左攪右攪.

見兔寶寶無著長褲, 就帶佢入更衣室加多件衫.
兔寶寶一見到JAKUCHI, 即刻走近想玩水!
大家放心呀! 影呢幾張相嘅時侯係有幾個大人圍住睇實佢架~



返出去大堂,
我地按摩時, BB都唔會悶架,
有好多人要應酬. ...

按完兩小時腳, 留响按摩中心食晚飯,
食咗預早一小時訂嘅水晶雞.

仲有一碗冬菇牛肉麵.
兔寶寶今餐就食雞、食麵.

食完晚飯, 本來諗住入房按身.
約好晒相熟嘅技師,
點知院方話有新規矩, 如果响11點前按身唔加鐘的話就唔可以留宿..
咁我地都係打算按兩個鐘, 無打算加鐘喎(一加鐘就即係按三個鐘),
於是我地就換衫出去行吓街先, 等過咗11點先入房按.

兔寶寶又可以玩吓車車..

今次玩咗三款機動遊戲.

玩完四圍行吓, 又去便利店買雪糕吃.
食完又返按摩院食佢免費提供嘅自助餐.
今晚有娃娃菜煮魚蛋、灼油麥菜、皮蛋瘦肉粥、炒飯、
鹽水花生、湯、蓮藕煮腩肉、烚蕃薯和饅頭.

宵夜來說都算很豐富喇!

接著我地就入房按摩, 兔寶寶乖乖瞓覺覺喇~

(續)