入屯門吃冬至飯

12月20日  星期四   寒冷

尋日我同兔寶寶入咗屯門做節呀!
BB一早起咗身, 我同佢去咗飲早茶.
天氣凍, 飲完茶, 我地兩個返屋企繼續大覺瞓!
就係咁瞓呀瞓, 瞓到成三點幾起身!
趕唔切食LUNCH, 求其買個包就上巴士喇!



上咗公公屋企放底D野, 又食咗D野之後,
呀公話要去市廣場行吓, 買件衫俾兔寶寶..

而呀婆就話市廣場有D野好啱兔寶寶玩喎~

坐响疑似餅乾嘅櫈度影幅相先!

又要坐吓車車...
不過呀公就話呀婆唔由門口抱BB入去, 而從窗口入...

又响咚甩入面玩吓!

兔寶寶坐櫈櫈影相,
與此同時媽咪就幫佢排隊, 玩"氹氹轉"...

就係呢個"氹氹轉"喇!
本來排隊嘅目的,
就係俾人一家大細上去影相嘅,
不過輪到我地時就無人排响我地後面;
呢個時候有個無大人睇住嘅小朋友上咗嚟玩,
咁就算啦, 多D人, 開心D...

跟住又有另一個應該係來自祖國嘅小朋友上嚟玩,
都係果句啦, 最多我地大人唔影相,
都要俾D小朋友玩嘅...
當我地見到有人排隊等緊, 打算抱兔寶寶走嘅時候,
呀B唔肯走, 並且尖叫咗一下.
呢個著綠色衫嘅男仔, 竟然走埋去,
大大力咁拍咗兔寶寶個頭一下!
佢媽媽可能認為佢個仔係幫我地教訓兔寶寶啦,
無阻止, 亦無道歉...
只係當我出聲話佢個仔嘅時候先至帶個細路走..
預到呢D情況呢, 如果唔係太過份,
我都只係會話, 你做哥哥唔可以大蝦細呀!
呀公見到, 係咁"啤"實佢兩母子呀!

**********************

好喇, 玩完原來已經六點,
我地上咗去稻香搵位...
好彩咁早上去咋!
好多訂枱, 我地咁早攞位都要等五張呀!

等食時, 兔寶寶又攪事了...

基於做節食來食去都係果D野,
加上有其他親戚响度, 我都無影食乜呀!
不過兔寶寶就好開胃(正常嘅, 佢都無正式食LUNCH),
又飯又麵咁, 食飽飽之後俾舊炸蓮藕餅佢,
都食咗小半塊..

隻手油冧冧想搶我電話(相機)?! 無咁易!

食完再行吓吉之島, 買返D聖誕禮物俾兔寶寶先...
呀B最鍾意大笨象架喇, 梗係要影返幅相啦!

望鏡頭先~