去公園玩 * 俾鬼仔蝦

4月1日  星期日  愚人節

今日愚人節, 大家有無整蠱人又或者俾人整蠱呀?

兔寶寶: 大家玩時玩, 唔好整蠱我.

兔寶寶八點未到就起咗身,
見天氣咁好, 我都想出外走走,
於是帶埋兔寶寶去九龍公園玩吓.

其實大約十五分鐘左右便可以從我家行去九龍公園,
不過推著BB車要走傷殘人士路徑, 斜路又多,
去到兒童遊樂場我已經行到成身汗了.
假日的遊樂場可真多人呢!!

滑梯爬架等好玩嘅設施都有很多小孩子,
見一旁無咁好玩(其實係俾BB又或者細D嘅小朋友玩)嘅位置無咁多人,
於是抱兔寶寶落地, 等佢企吓.
兔寶寶: 等我彈首歌俾媽咪聽吓先.


金髮BB: 媽咪果度有個靚女呀, 我去撩吓佢先!

兔寶寶: HELLO!! 我地一齊彈琴吖!!
金髮BB: ERR...其實我唔識彈架!!

唔知個金髮BB係咪唔鍾意兔寶寶咁主動呢,
呢個鬼仔竟然推開兔寶寶.
好在兔寶寶馬步夠隱扶得實無跌倒,
仲識得兇返人...
兔寶寶: 你做乜推我?!

兔寶寶: 媽咪佢蝦我呀...

鬼仔媽媽見狀就叫個仔要友善D分享玩具,
個鬼仔可能覺得無癮啦,
就行去玩第二D野.

行吓玩吓好累呀, 見有櫈坐吓先!
兔寶寶忙於八八掛掛, 左望加望, 都唔得閒望鏡頭了.

玩完一輪返屋企, 大少都起身喇,
於是走落麥當奴食野.
睇吓兔寶寶幾八掛, 想望隔離枱個叔叔,
擰到條頸幾盡!!

食完一個麥當奴餐整多杯雪糕新地嘆吓,
兔寶寶見到即刻抓住我想搶嚟食,
搶唔到就即刻喊.
以後我都唔敢响佢面前食雪糕喇!