週日雜記

8月25日  星期日  晴天

呢篇雜記唔止雜, 仲好舊添~
上星期日雖然雷暴警告, 大少依然話要帶D小朋友去行山!
仲講到條路有幾崎嶇險峻, 唔可以帶兔寶寶去云云....
我心諗, 既無行山棍, 又唔係著行山鞋;
最重要一點係, 你大少行得嘅路險峻極有限啦!
最後佢都帶埋兔寶寶去『行山』喇~

大少唔send返D相過來都唔知原來宜家D「山」係有冷氣又有野賣嘅!



呢個「山」仲鋪晒地毯架!

到差不多回家嘅時間, 打電話問吓大少有無同兔寶寶食野...
佢話食咗, 慌C我唔信, whatsapp張相我睇....

捧住個大碗, 應該食得好飽吧!
但知女莫若母, 有得玩仲洗食咩?!
煮定大大碗牛肉飯等呀B返嚟食...
結果...全碗食晒呀!
問多大少兩句究竟佢食過D乜,
先知原來個大碗入面只係裝住隻牛角包!


**************************************

農曆七月十四那晚, 吩咐過大少早D回家休息,
晚上十一點打俾佢, 原來佢又打緊邊爐...
可能佢知我會話佢鬼節仲出去玩,
買咗盒手打芝士牛丸返來,
實行牛丸打人牙較軟!


呢盒野要七十五蚊!
平均七個半一粒, 好貴呀!
大少實在太唔明一個女人做咗母親之後嘅轉變,
咁貴嘅野, 我係唔捨得自己食的, 食剩咗就話姐!
於是呢十粒牛丸,
第二天被我剪爛晒讓兔寶寶分兩餐送飯食了.


*******************************

呢日兔寶寶著住橫間衫加橫間裙,
樓下office姐姐笑佢好大個肚腩呀!

呢幾張相笑得幾開心!
呢一刻我正返緊樓上放低D餸,
多謝長髮姐姐為我提供相片.