去葵芳行街街 * 南翔饅頭店

2月1日  星期三  晴天


HI!! 又係我呀! 又係我兔寶寶D相呀!!


尋日大少放假, 我地去咗葵芳行街...
應該係掃街先啱呀!!
因為我地一路行, 一路買咗好多小食,
有魚蛋啦, 雞脾啦, 吞拿魚crepe啦, 齋卷啦, 仲有果汁,
全部都又平又正, 不過掛住食, 無影相...
食飽飽行街街, 大少同兔寶寶就買D衫褲鞋襪;
我咁為食就梗係買咗好多零食啦!!
行到攰, 買咗塊呢排好hit嘅雞扒...

可能我地懶健康買咗塊無皮架啦,
乾爭爭, 唔好食;
基本上塊雞扒D調味都麻麻地,
唔知點解D人話好好食呢?!

呀媽晏晝去咗荃灣睇骨科,
有好消息: 醫生話可以過一個月先返去覆診,
呀媽都話覺得無晒事咁LU!
所以我真係覺得, 有D週身骨痛都係去睇專科好,
好過睇趺打, 要估估吓唔知佢有無料.
我唔係唔信趺打又或者中醫,
而係盲摸摸又真係好難撞到一個好架囉!

搭地鐵去荃灣會合埋呀媽, 同埋呀哥一齊食晚飯...
我地去到荃灣站果時,
有個地鐵職員見到兔寶寶架座駕咁龐大,
call人開咗部"職工專用"嘅升降機俾我地,
再行條特別通道上返去大堂...

*************************************************

夜晚去咗綠楊坊嘅南翔饅頭店度食.
叫咗一個四人餐.
有醉雞做頭盤,
OK好食, 份量都幾多喎~


小食有蘿蔔絲酥餅,
湯有砂窩津白.
小菜選咗獅子頭,
呢幾樣都OK.

仲有糖醋魚塊(?!), 賽螃蟹同埋清炒時菜,
仲有個炒飯無影相;
呢幾樣就唔係難食, 又唔係好食啦!

再加多個小籠包,

上海野都係比較油膩, 無野啱BB食,
 大少同呀媽就忙住餵兔寶寶飲水同麵包..
不過兔寶寶心情唔多好, 鬼咩?
無得食事少, 間野無BB櫈,
焗佢要坐BB車, 矮人一大截, 心情好先奇...
.

兔寶寶成餐飯不停呱呱叫,
舅父都忍唔住抱佢出去兜個圈行吓街.
到甜品嚟, 係桂花拉糕,
好似年糕咁, 但淋DD易咬D,
俾咗小小兔寶寶食,
佢心情先好返少少...

原來八點前埋單, 全單有九五折,
我地本來唔知架!
埋咗單先知, 好好彩, 我地係七點五十九分埋單,
差一分鐘就慳咗廿幾蚊!!
呢間野麻麻地, 但都有好多人等位喎?!

唔夠喉, 走去食甜品...
舅父抱住兔寶寶, 我地响後面跟住,
兔寶寶就不停揮手"HI"我地.