椰絲雪芳 & 薑汁肉桂雪芳

10月1日  星期六  晴天

上次焗嘅蜂蜜雪芳, 三兩下手勢就俾大少KO咗,
尋晚襯有時間焗咗個椰絲雪芳...
同上次個食譜差不多,不過就無咗蜂蜜,
又將白糖換成黃糖,
並加入大約兩三湯匙椰絲.

因為用咗黃糖, 今次深色D...


蛋糕仔好似人地用來拜山果D鬆糕...

剝咗殼又有D似孖寶蛋糕...

至於6吋果個, 今次甩模衰咗,
唔記得界開煙囪果個位先,
樣衰衰咁砌返影張相...

不過咁, 大少都無嫌棄呢個醜陋嘅蛋糕,
連埋蛋糕仔差不多食晒,
醒起未影相先留返一忽仔俾我試味同影吓內部組織.

呢個蛋糕食得出黃糖嘅香, 亦食得出有少少椰子味,
有少少椰絲增強口感, 不過落得唔夠多,
大少都話下次可以落多D!

兔寶寶: 呢個蛋糕太樣衰, 唔多滿意....

心有不甘臨門一腳甩模失敗,
今日再焗多一個,
聽日呀媽應該會嚟喇掛?!
焗一個啱D佢口味嘅,
薑....佢大概會覺得"正氣"吧!
加埋肉桂....

出爐喇!! 又係用咗黃糖, 深色D...

加多一個蛋糕仔...

今次甩模好小心...

幾靚...

仲好香添呀!!

兔寶寶: 算你啦!