上顎出牙仔喇!!

12月12日  星期一  寒冷

兩日無寫blog,
唔係因為我要冬眠呀!!
上次兔寶寶發燒,
為咗方便我照顧佢同埋探熱,
佢就跟我地一齊瞓.
三個人"質"埋落一張四呎床上面.
跟住呢幾日凍,
兔寶寶需要多D熱能掛?!
佢又要起身食夜奶,
我就真係唔係好想半夜三更走出溫暖嘅被窩,
所以呢幾日佢都係同我地瞓.

兔寶寶雖然細細粒,
但佢唔係"大"字型咁瞓,
就係雙手作投降狀咁瞓;
佔咗張床一半嘅闊度.
我同大少就一個頭向東一個頭向西咁瞓,
大家對腳先至有多D空間伸展.
如果大家都唔郁嘅情況下都無咩問題嘅,
我就梗係話自己瞓得好定架啦!!
不過兔寶寶就好鐘意一路瞓一路踢,
一晚我起成六, 七次身,
再加埋我本身好醒瞓,
佢有時發夢發出D聲音出來我又醒一醒望吓佢發生乜野樹,
成晚好似無瞓過咁.
真係乜都唔想做, 乜都唔想郁呀!!

尋晚我就俾兔寶寶瞓返落BB床,
費事整慣咗,
第二時佢唔肯自己瞓呀!!


*********************************************************
呢兩日兔寶寶有咩進步呢??
尋日發現佢上顎都出咗一粒仔牙齒喇!!
仲有就係佢識得自己抓住東西自己企喇!!
當然唔係話企得好隱啦!!