兔寶寶十四個月大

6月15日  星期五  晴天

兔寶寶14個月大了!!
雖然體能發展方面, 都係同13個月一樣,
唔識自己行、 企都唔太隱, 甚至我覺得佢宜家連行都懶得行....
最近呢幾次去公園, 佢死抱著我唔肯落地;
"夾硬"俾我捉咗落地了, 又故意放軟對腳唔肯企~
佢知我唔敢放手架(除咗屋企佢知其他地方唔可以週圍坐),
成條軟皮蛇咁,
真係無佢符呀!
我都好想佢快D識行, 除咗係帶佢去玩會好玩D之外,
我仲想襯呢個夏天幫佢戒片! 聽講係要等BB行得隱嘅時候幫佢戒會好D,
所以我都好心急! 唔係話要求佢完全戒晒片, 至少叫做嘗試下日頭响屋企唔著片, 咁就好好了. (雖然我想像到過程係要抺一次又一次嘅地....)

語言方面, 除咗爸爸媽媽, 而家佢識多一樣野, 就係"wrong wrong"....
大家唔好誤會兔寶寶識得分"錯"同"對"呀!
此"wrong"並非解作"錯誤", 而係扮狗吠嘅叫聲!
Wrong wrong wrong即係汪汪汪咁解...
(婆婆嫲嫲唔好怪我唔教佢叫你地呀!!)
而家响街又或者响書度見到狗除咗會講"wrong wrong wrong"之外,
仲會用隻手仔拍下心口來表示好驚, 而呢個動作係見到大狗先做!


雖然兔寶寶嘅身體同語言發展比較慢,
但佢好叻模仿人,  常常攞我地D電話來扮講電話,
至攪笑係佢會攞起本書仔又或者搖控器來扮電話!
不過亦由於我做乜佢又要跟住做乜,
無論餵飯(我餵緊佢時頭幾啖都好順利, 到佢開始無咁餓時就開始搶我隻匙來"畢"碗入面嘅野, 要自己畢來吃唔俾我餵, 因此佢而家食少好多野)、梳頭(我幫佢梳頭佢又要梳)、夾頭髮(夾好嘅夾仔要抆落嚟自己夾)等等都比以前無咁順利.

前兩日我仲發現, 兔寶寶嘅性格都幾倔強.
一直以來佢飲奶時都很喜歡一路飲, 兩手一路摸摸(或者輕輕扯扯)自己的頭髮,
我見她一臉陶醉就沒有阻止她這個小動作.
近期可能出牙仔嘅關係吧! 佢愈扯愈過份, 愈扯愈大力, 但佢又好似唔痛咁.
身體髮膚受諸父母, 佢咁扯法我當然肉痛啦!
於是我非常嚴肅咁捉住佢雙手, 講"唔准扯頭髮";
佢一扯我就拉開佢, 唔俾佢食奶.
如是者幾次之後佢就明白了我唔俾佢扯頭髮.
但佢個樣好唔服氣(但又唔喊喎!), 特登用手大力扯, 配合埋佢表情(非常肉緊的樣子)和聲音(一路扯一路EEE, 代表好大力), 故意挑釁我.
我都有想會唔會係我諗多咗, 照計兩嵗(trouble two)先會咁架姐?!
跟住我諗諗以前佢啱啱出世, 我地用包被包住佢,
佢點樣掙扎都要"揚"開張被.
我估我呢隻女大概同我一樣, 受軟唔受硬吧!