吃、吃、吃的一天

8月23日  星期五  晴天

星期三本來大少放假架,
臨時有事早上都要返工.
上星期八号風球已經無街去架啦,
呢日無論如何點都要出吓街先高興...

一個人拖住兔寶寶搭電車去金鐘行吓,
坐電車坐到出晒汗,
食返杯乳酪雪糕先~



兔寶寶隻手完全唔怕凍架,
攬住杯雪糕, 直至食完為止,
唔捨得放下...

本來想响商場行住等大少放工一齊去買餸,
但見天色昏陰, 大少又唔知幾時先做完野,
於是我同呀B搭叮叮返屋企先...
返到屋企果然落起毛毛雨,
於是大少自動請纓買埋餸返屋企, 唔洗我地騰來騰去...佢掛住做野無食午餐,
呢餐晚飯五點鐘就食喇!
佢買咗一斤菜芯, 白灼...



一斤海蝦, 又係白灼...

我响屋企用雪櫃物資滾咗個雜菜湯~

兔小姐一見碟蝦就指住要食喇,
等陣先啦, 啱啱灼起好熱架~

等凍少少先摵俾你啦~
爸爸見到佢洗完頭無紥起頭髮, 就幫呀B用個大夾夾起,
佢一定以為個女D頭髮好厚定喇!

咁少野食梗係唔夠啦,
我地叫咗pizza呀!
本來想外賣自取單一個pizza,
見落雨懶得落街, 就叫人送成個餐來啦!

又係果D野...真係悶悶地,
下次要試其他先得..


今次叫咗"啖啖肉", 真係好多肉,
不過唔太啱我同兔寶寶囉~
大少話幫我地食晒D肉佢喎!
真係唔該晒喎! 咁塊pizza咪超樣衰?!
本身今次送來時都歪埋一邊, 唔係圓碌碌架啦!

分D俾兔寶寶, 初時D食物很熱,
呀B一副不知如何下手的樣子...

係喇, 吹吹佢就食得啦~

咁多野食, 當然係食唔晒啦,
食剩大半個pizza, 一件雞同幾粒墨魚丸.
留返第二日焗返熱佢, pizza個餅底會軟少少,
呀B更易食架!

食完pizza, 仲有龍眼涼粉.
呢度三磅龍眼, 搣完我隻手指都有D損損地...

大少同兔寶寶都好欣賞呢盒甜品喎,
襯我洗緊碗, 一食就食咗三份二有多,
剩下最底一層龍眼連水俾我, 對我好到呢...

放D食剩嘅pizza入雪櫃時, 先醒起中午行街時買咗盒蛋糕,
東海堂下午特價嘅拿破侖, 廿八蚊.

以為兩父女食飽龍眼, 見我切蛋糕又要一份...
真係吖, 食完一樣又一樣,
好似開大食會咁~