兔寶寶38週了............甲狀腺覆診

4月8日   星期五   炎熱

今日兔寶寶踏入38週了.....
呢兩日好強烈感覺到佢對脚响度踢我呢!

之前我係要擺隻手响肚皮上面, 又或者望住個肚皮有跳動, 先感覺到佢郁嫁!
我真係遲鈍呀!!
我想兔寶寶大力D踢tim呀!
佢愈大力, 即係佢愈健康, 愈大隻囉!

今朝一早就去咗QE喇....約定時間係9:30a.m. , 我9:10a.m. 就到咗...
張覆診紙寫我係第10個睇嫁, 不過我去到時得我一個人等, 醫生一嚟到, 第一個就睇我喇! 真係好!

前兩日抽血嘅結果係, 我嘅甲狀腺素仲係低呀, 不過我無臨床病徵, 同埋兔寶寶自己本身嘅甲狀腺大概已經成熟去分泌甲狀腺素, 所以都唔會加重劑量.  下一次覆診就要等兔寶寶出世之後lu.....

呢 幾日大少都因為皮膚痕癢而煩惱不已.... 識佢咁耐, 都未見過佢咁神心去睇醫生. 直頭係睇醫生D藥都未食完一日, 就去睇第二個醫生.有兩日佢直情等個醫生開門呀...醫生開D抗生素同抗敏感藥俾佢, 都話明要食晒先會好, 仲同佢講呢D皮膚病係手尾較長嘅, 要俾D耐性.....

大少食咗D藥可能好眼瞓, 呢兩日都早咗收工返屋企休息, 個人又無咩心機....而我都俾佢感染咗, 成日覺得週身痕, 又驚大少傳染我....於是一日到黑左抺右抺, 又漂白水又消毒藥水; 佢D衫衫褲褲又要分開浸同洗.... 攪到而家成間屋都係消毒藥水味呀...

到今日下午大少先至話好返七七八八, 心情好返D咋...