週未閒談

9月27日  星期六  晴天

好久無寫blog了, 

平日為咗返工更有精神, 

都早早上床休息, 

慶幸係雖然一晚醒扎醒幾次, 

但做咗夜鬼咁耐, 可以十一點幾瞓得著已算係咁...

星期六返長短週, 

學校雖然都係開朝八午一, 

但我一點才放工, 

趕不切接兔寶寶, 早上又要先送佢返學, 

時間上太不化算了..

於是每個長週, 我都留低俾大少同奶奶照顧.

奶奶咁啱呢兩個星期六都在中午十二時左右離家, 

就係咁, 响我放工趕回家前, 

有個幾兩個鐘頭, 要拜託大少"照顧"兔寶寶..

而大少照顧兔寶寶嘅方式呢, 

就係邊瞓邊照顧, 

有乜事大聲嘈到佢就擘大眼睇下;

又或者佢要乜就俾乜佢玩..

今日放工返屋企睇下呢...真係嚇傻咗, 

成間房亂七八糟, 慘過俾賊仔入過屋, 

大少仲要笑笑口問我, 發唔發現兔寶寶D頭髮少緊忽?!

好得戚地說幸好佢及時收起把較剪....

我心入面真係講晒粗口架,

但都無辦法, 雖然我有諗過, 

要搵份只返五日嘅工...

但諗...係咁容易咩?!

上個長週, 

大少whatsapp我, 

個女玩到無野好玩, 著我條褲嚟玩..

放假嘅日子都係帶佢四圍去, 

行吓行吓, 好容易就會行返去灣仔動漫基地果度...

 

某日試咗麥記新出品, 

蘋果批加雪糕, 

食一個一定飽晒.

唔少得去中央圖書館睇書加玩玩具, 

好多時仲會加多一項有益身心嘅活動, 

就係過隔離運動場行圈!

我係行路一支箭嘅人, 

只要再行快多少少, 兔寶寶已經跟唔到架喇~

跑完圈, 去飲水機飲水都係一項新奇有趣嘅節目...

對一個三嵗細路而言..

中秋果排, 

睇完圖書, 仲可以去對面維園睇花燈..

宜家先出呢D花燈嘅相, 

我個blog真係生晒草了~~

有無發現兔寶寶由始至終都拎住個大背心袋呢?!

佢當係寶架!

 

就算要塞個頭入去扮熊貓, 

C都唔肯放低個袋...

 

袋入面有兔仔裙一套, 

响救世軍買, 只係八十幾蚊, 

就有紗裙、神仙棒同鞋仔一對!

最重要係對鞋有得綁繩較size!

之前响街邊檔睇過呢D笠响面嘅紗裙, 

一條似樣少少嘅都要七十幾蚊!

 當晚佢無胃口食飯, 

只係掛住沖涼, 因為沖完涼可以扮兔女郎!