去街街

6月22日  星期日  陰天

 

兔寶寶响屋企一見我得閒, 

 最鍾意叫我"去玩"...

大概個個細路仔都係咁~

去吓超市、落樓下買麵包, 

就叫做"去街街"...

星期三大少放假呢日, 

呀B日頭要返學, 

做爸爸嘅攞正牌瞓到三、四點先起身!

夜晚去咗德興打邊爐.

熱C辣辣走去十吓十吓..全因貪便宜事!

早兩個月前買嘅團購..抵就真係好抵, 

埋單都係二百蚊鬆D...

但呢個季節食火鍋, 

有D食物例如炸魚皮、魚腐呢D就唔太新鮮, 

而蔬菜亦都只得小白菜、通菜娃娃菜和菇類等濕毒菜.

呢日我理得佢三七廿一食咗先算, 

可能心情放輕鬆, 一粒紅疹都無起~

幸好四嵗以下免費,

兔寶寶當晚就係食咗一個麵餅同少少牛肉, 

臨尾確定佢唔再食, 俾多隻出奇蛋佢又食又玩~

 

***********************

星期六又係去跳舞!

窮媽媽每次去之前都研究下條半身裙襯乜野上衫會好睇D~

上完堂, 去睇舅父同朋友打乒乓波~

佢都有落場...執波!

兔寶寶好專業架!

執三個跌一個都永不放棄, 

開開心心咁仆倒去每個各落執波.

就算唔小心响枱底狠狠咁撞咗個頭一下, 

C忍爛忍都唔流一滴眼淚,

咬住咀唇強忍痛楚, 以免影響在場球員情緒,

呢D就係有操守嘅執波員表現! (致敬ing)

做呀媽嘅堅驚個女會再次"因工受傷", 

要佢quit咗份工, 帶佢出去睇人打羽毛球!

呀B唔係食手指喎!

舅父, 你買嘅手指餅愈食愈好味呀!

等舅父打完波, 

行咗九條街去搵野食, 

兔寶寶今次名副其實..去街街!