長洲半天濕身遊

8月24日  星期日  晴天

剛剛過去的星期三, 

我們去長洲玩了半天.

約了婆婆和舅父下午兩點在五号港外線碼頭會合,

早上無野做, 先去波波池玩.

去到碼頭未入閘上船, 

見到有富豪雪糕車响正碼頭對出, 

尚未吃午餐的我馬上跑去買一支, 

兔寶寶豪不客氣的吃了一大半.

上船了!

來張三人照~

這三幅相照得婆婆很年輕~

兩婆孫笑得很燦爛, 

但舅父面容崩緊, 

可能係坐船都要拎住一大袋野吧!

我同兔寶寶的自拍照.

來到長洲, 第一件事係找吃的!

呢日天氣非常不好, 全日都落住雨, 

但我們來時剛巧遇著一大班學生, 

又濕又多人, 求其去了一間茶餐廳吃.

 叫了三個餐, 

餐飲要了兩杯熱茶走, 

我要了珍珠奶茶, 跟餐不用多加錢,

味道都幾好.

婆婆要了奶醬豬餐...

個包...真係好細個!

呀婆飲完茶先嚟就唔太肚餓!

可憐嘅舅父! 

未食晏, 要了芝士碎肉漢堡餐, 

個包一樣係咁細, 同個牙纖筒差不多大小.

我都唔好得幾多, 

一樣未食晏, 叫了雞翼沙律餐..

呢份係正常下午茶size,

但俾兔小姐獨吞了兩隻雞中翼, 

還要飲咗我半杯可以用來頂肚的珍珠奶茶..

食完呢餐, 舅父暫時離開我地一陣.

此行目的, 係陪佢响長洲寓工作於娛樂, 

順便帶呀B出去玩下.

唔夠飽, 走咗去買包食.

長洲有兩檔舊式麵包鋪幾正...

唔係專登影兔寶寶食包, 

而係呢個時候好大雨, 

我地走咗入街市避雨呀~

 

等兔小姐食完包去下廁所咁, 

舅父已完成一半工作歸來, 

我們冒雨在長洲行了半個圈...

影呢幾張相嘅時候, 

算係無咁大雨架喇~

 行到停雨, 

終於同兔寶寶影返張長洲風景照.

跟住...又落過大雨!

有傘都濕半個身, 

一路行一路感覺到對襪唧D水出來!

於是行咗去體育館避雨.

 呢個體育館面積很細, 

全層只有兩個年輕人在打羽毛球.

除了睇人打波, 只好吃下零食打發時間.

圖為兔寶寶想俾又唔俾呀婆食紫菜.

仲有乜好做呢?!

咪望下窗口, 睇下細雨D未囉?!

等細雨小小, 

我地就行出去海皮食飯喇~

小圖果盒利賓納, 

因為兔小姐唔合作食飯, 

所以到目前為止, 佢都係仲未飲到落肚嘅.

無叫海鮮餐, 

散叫了自己喜歡吃的小菜, 

埋單其實抵過叫餐!

小朋友唔肯食飯就係咁嘅樣喇~  

佢話自己好飽喎..

之但係食椒鹽白飯魚呢, 

佢又有胃口喎!

食完飯我地就要趕船喇~

臨行前都依照承諾買了隻大菜糕蛋蛋俾兔寶寶.

上船後佢同呀婆高舉此行戰利品..

開船時, 

我們都同時間做了一件很失禮的事..

就是除鞋除襪子, 俾對腳乾爽吓...

兔寶寶未食飽飯, 食腳趾.

玩了整天, 

兔寶寶竟然未睡過一覺, 

真是後生可畏.

而我, 累到癱了.