週五雜記

5月9日  星期五  雨天

 近期keep住日日都寫blog,

不過追唔到寫返即日嘅事.

我覺得當係日記咁寫會好得多, 

可以記下每天兔寶寶所做過、講過嘅有趣事, 

因為好多野我會瞓醒就唔記得!

上週日在家吃完簡單午餐後, 

拉埋大少去同兔寶寶去圖書館, 

之後去行街街.

呀婆前一天無告知就靜靜從屯門走出來, 

上了巴士才打給我~~

一下無為意手機較了靜音, 

婆婆聯絡不到我之下又沒有打給大少,

所以上我家摸門釘了..

白白遊了一轉巴士河!

當我們回家後才知道呀婆特別留了一把小雨傘在門口.

(是我發現有miss call後回覆婆婆才告知的)

兔寶寶收到呀婆的手信, 好開心...

但這兩天又大風又大雨, 

呀B拿著雨傘行不到兩條街就沒力氣了.

她兩手忙著擔遮沒有手拖著我, 

而我則一手擔遮, 

另一隻手一時扶著她的背防止走散, 

一時又要幫佢hold住把遮, 弄得狼狽非常.

(等我仲諗住影幅落雨擔遮圖俾呀婆睇,  除非有第三隻手啦!)

幸好一早替她穿上雨衣作後備, 

最後只好幫佢關起把遮, 由得佢拎住一路行一路篤...

之前講過兔寶寶返playgroup, 

老師好有心為學生準備教材.

原來唔止教材, 連茶點時間預備嘅食物都幾有心!

有一天早去, 見到老師自己煲了ABC粉, 

返果兩小時都有粉麵食!

又見過佢地用粟米片加豆漿, 

總之就係樣樣試下.

大家仲記唔記得以前响幼稚園係食乜野茶點呢?

我返幼稚園時, 

每日嘅茶點唔係動物餅兩塊就係咸豆仔餅乾四粒, 

三年如是, 唔係A餐就係B餐!

星期一大少同我一齊去接兔寶寶放學, 

然後行咗去茶餐廳食TEA.

我叫水餃麵, 

大少就要邪惡的沙嗲牛肉+肉丁烏冬.

水餃全部俾兔寶寶食晒, 留返淨麵俾我.

食完野大少返工, 

而我又帶咗兔寶寶去室內遊樂場玩.

愈來愈喜歡去果度玩, 

一來唔洗錢設施又好, 

連水機都有埋, 帶個樽去就攪掂, 

連揹水嘅力都慳返!

二來係果度全部鋪晒軟墊, 

基本上我唔多需要睇住佢, 

可以坐埋一二邊睇書, 樓下就係圖書館, 

即日借即日還, 超方便!

三來就係果度有勁多鬼仔鬼妹仔, 

兔寶寶同佢地玩, 又當返多兩個鐘playgroup, 

好抵!

 

一玩就玩個幾兩個鐘, 

帶定隻大香蕉, 俾佢中場休息時吃~