HIPOT一人一鍋

9月14日  星期五  炎熱

前日星期三, 我地又去咗游水呀!
室內池依然有賽事不對外開放,
唔緊要! 反正我都影晒相咯!
曬到變朱古力就朱古力啦,
如果因為怕曬而放棄同兔寶寶玩水嘅機會,
實在太可惜喇!

我同兔寶寶都搽咗厚厚嘅防曬,
中途又再補一次, 果日咁曬都唔係黑咗好多咋!

游完水, 大少提議去食家鄉雞.

吓! 我超肚餓喎, 時為三點三,
我只係早餐食咗碗麥皮咁大把.
吃家鄉雞, 以我當時狀態, 即使吃兩個餐,
都唔夠飽...


大少無理我, 行到去壯氏倫敦廣場,
見到有HIPOT嘅招牌.
醒起果度下晝都有邊爐打,
上去望下啱唔啱食,
睇見果個時間都OK多人,
價錢又平, 咁就來一個快打邊爐.

大鄉理, 唔知有乜野湯底,
問吓沖沖忙忙嘅侍應, 佢手指指出面枱嘅一碗碗醬料.

之後有人送上兩個鍋,
一看好似滾水咁.
原來係好似食即食麵咁,
要蕃茄湯底落蕃茄醬、豬骨湯底就加豬骨醬;
仲有沙嗲醬、龍蝦湯底醬等等...

大少乜都唔加,
所以佢果鍋就淥埋俾兔寶寶食;
而我就要豬骨湯醬...
放湯底醬旁仲有豉油、辣椒豉油、蔥花、蒜蓉花生碎辣椒絲等俾人自取;
各式飲品都係自己攞架!

見到有個架放咗曲奇餅, 又攞幾塊食住醫肚.
兔寶寶緊係唔執輸食翻塊啦!

侍應又問我地要牛定豬,
咁我地緊係要牛啦!
原來每人有一盒三塊...
我果三塊, 進貢咗俾大少...

除咗呢盒只此一盤嘅牛肉,
其他食物都係自己出去任攞的.
種類都唔算少,
有三四款菜類, 菇類都有三款,
呢樣野幾啱我, 肚餓時先吃D菜打底,
唔洗食太多肉.

仲有雞肉, 豬肉同魚肉,
各式丸類同豆品類等等...
怕兔寶寶肚餓, 一開始我就攞咗包公仔米粉淥俾佢吃...

較為特別嘅係呢兩款丸,
點都估唔到入面係芋蓉同南瓜蓉,
甜甜地, 都幾好食架!

食完晒主菜, 仲有芝麻糊同杏仁露任吃架!
埋單兩位計晒所有野都只係九十六蚊,
真係超值呀!


*********************************

兔寶寶做乜事嘔白泡?

真陰公, 米粉都未淥好,
兔寶寶就咬著曲奇餅瞓著咗...
我影相時"咔嚓"一聲, 兔寶寶又張開眼望望...
喂, 唔好瞓呀! 食咗先瞓啦!

一秒過後, 眼皮再次合上,
而曲奇餅照舊掛在咀巴上.
最後要勞煩大少進行"蚊餅"儀式,
及由我細心而溫柔地抺乾淨咀邊餅乾碎...