HEA足一天

2月21日  星期二  微雨

尋日大少放假, 我地三個同時瞓到十一點幾起身.
之後大少去公園跑步, 我地就响公園玩...
我抱住兔寶寶玩咗好耐鞦韆呢!
大少跑完步, 又過來同我地玩咗一陣,
跟住佢又唔知發咩癲推住架BB車一路跑,
叫我响後面追, 追到我上氣唔接下氣...
响兔寶寶未玩謝我之前, 大少已經玩C我了...

玩到點幾兩點, 又攰又餓,
連屋企都唔返涼都唔沖就直接去咗飲茶,
好彩我帶埋銀包落樓咋!
好肚餓嘅關係, 走咗去任點任食.



頭輪點心無影, 影咗D甜品.
大少食咗TOTAL八件椰汁糕,
足夠補充返佢跑完消耗咗嘅卡路里有突!!

兔寶寶攪乜咁嘅表情?! 佢都有齋腸粉食架喎!

食完野返屋企沖涼, 天陰陰咁都唔知去邊...
我就陪兔寶寶飲完奶瞓覺覺, 大少就自己打機...
响屋企HEA足幾個鐘, 晚上去咗旺角打邊爐.

天氣凍, 好多人選擇烚下烚下,
個知客本來叫我地等耐D等張鬆動D嘅枱,
等下等下好多遲過我地嚟嘅人都入咗去,
逼D就逼D啦!
你睇下D枱密質質, 唔洗伸長隻手就可以掂到隔離張枱.

其實愈逼愈多人兔寶寶就愈開心,
有得俾佢八八掛掛撩人玩.

當然啦我仲有殺手簡,
叫咗一個鴛鴦鍋, 其中一邊只放清水,
咁就可以烚D薯仔蕃茄俾BB食.
有得食有得玩仲有電視睇,
食咗兩個幾鐘都無呱呱嘈.