話說大少瞓瞓下會起身一兩次上洗手間.
我就唔覺得係乜野一會事啦,
飲得多水去多一兩次廁所好自然姐...
不過大少就好介意, 成日話自己好多"夜尿",
為咗呢樣野睇過中醫同西醫架喇!
有一次行街見到有檔賣炒栗子嘅小販同時賣埋烤白果,
上面有塊紙皮大大隻字寫住"止夜尿",
咁我就同大少講啦, 佢就叫我整D白果俾佢食喎!
以前我煲粥都會落D白果落去架!
不過宜家煲粥兔寶寶食多,
我又聽人講話白果帶少少毒性唔係咁啱BB食,
再加上無時間去殼去衣, 都少咗落白果煲粥.
果日大少放假, 有佢幫我睇住兔寶寶,
我先有時間買D白果攪下.
本來諗住整糖煮白果,
但係呀大少又唔鍾意食太甜嘅野.
反正佢咁鍾意食椰汁糕, 就嚟個cross over,
整銀杏椰汁糕啦!
屋企有幾D魚膠片, 就用佢嚟做凝固劑.
亂打亂撞之下, 整出來嘅椰汁糕軟硬同甜度都啱啱好,
而且椰漿比重高, 好香濃椰汁味仲好滑.
不過白果始終帶少少苦, 唔鍾意食白果嘅人就唔多啱喇!
食譜:
大椰汁一罐 ---- 400克
魚膠片3片 --- 15克
白果肉 --- 約1杯
冰糖 --- 2 大粒
煉乳 --- 2匙
做法:
1. 白果去殼去衣, 加約兩杯水煮至白果熟,
再加冰糖煮至白果淋身.
2. 留起300ml煮白果水備用, 其餘倒掉.
3. 浸軟魚膠片後, 放入白果水中攪溶.
4. 加入椰漿, 再加入煉乳試甜味.
5. 倒入模中, 放入雪櫃至凝固.
為免白果沉底, 我懶醒咁先做一層齋椰汁嘅,
等底層凝固之後先加多層白果椰漿,
咁雪凍之後D椰汁糕就會有層白果响中間啦!
可惜我倒模倒得好失敗, 最底果層留响模入面,
就算我用蒸汽先蒸一蒸個模先起都係起到一岩一忽.
點樣先可以起得靚D呢? 係咪要响個模度先做D手腳??
*************************
兔寶寶雖然識講爸爸媽媽, 但係唔係成日講,
更加唔係一叫就講.
可憐嘅大少只係親耳聽到兔寶寶叫爸爸一次咁大把.
尋晚大少返咗工,
臨瞓前兔寶寶就不停咁叫"BABABA".
我一攞部相機出來想話錄低佢, 兔寶寶就停口唔叫,
今次我醒喇, 唔開燈等佢睇我唔到.
所以錄出來係幾乎無畫面架!
今日我俾大少睇返段片,
佢唔多謝我不突止, 仲話我影到兔寶寶好似"攝青鬼"咁,
睇完會發惡夢咁話喎!
沒有留言:
張貼留言