長沙宿營之旅---- Day 3

10月23日  星期二  晴天

續: 長沙宿營之旅---- Day 3

嚟到最後呢日, 吃罷早餐,
大人都忙於收拾東西, 準備在10:30a.m. 辦check out手續.

唔知邊個忘記關上廚房門, 兔寶寶偷偷走入去參觀呀!



兔寶寶: 咬哎~ 俾人發現咗添...

兔寶寶: 臨走想話响度玩吓煮飯仔都唔得...

差不多準備走人時, 我地發現有隻牛牛响屋外,
好似歡送我地咁添~

現實中無可能响15樓養隻牛牛,
宜家一打開窗竟然有隻牛同我地講早晨,
呢種體驗令人好興奮呀!



機會難得, 兔寶寶即刻拖住呀婆攝埋去影幅相.

仲有我地三個靚女加隻壯牛影合照..

Check out之後, 我地又係call返的士出梅窩.
企响碼頭等船都幾大風, 我不忘為兔寶寶著返件外套....

著咗呢件外套, 好似男仔呀!

不過呢個LOOK遮起個額頭,
就好有兔寶寶還是幾個月大嘅感覺...

去到中環再轉船去尖沙咀, 我地就轉巴士去九龍城,
响九龍城廣場嘅馥苑飲茶.
我地都叫得幾多點心架!
較為特別嘅有蓮藕餃、菜粒餃.


又有蒸魚雲、牛仔骨咁.
不過呢間酒樓都唔平,
好似盅飯係下午茶特價, 都要三十幾蚊.

仲有一碟枝竹斑頭腩炒麵打底.

呢餐埋單都要三四百蚊,
本來呀公一坐底就話呢餐等佢嚟請,
不過最後都係由舅父俾錢...
係呀! 真係要多謝舅父, 因為今次嘅長沙宿營之旅,
除咗我買手信嘅錢之外, 其他費用係由舅父全包架!
就算之前因為就手我俾咗部份錢, 舅父係都要塞返D錢俾我,
仲要佢係做得最多, 食得最少果個;
真係...........多謝晒!!!

**********************************

飲完茶, 我地就搭的士去鑽石山,
提早掃墓.
我地坐响公園等呀婆去買香燭冥鏹.
呢個公園, 以前我地細路仔嘅時候,
每年拜山都會嚟, 响呢度等齊人先上山架~
都唔知留底幾多腳毛同回憶响度.
幾廿年來都無响度拍過照,
第一幅就留俾兔寶寶...

兔寶寶: 媽咪, 點解今日我遇到咁多牛牛嘅?!