續: 長沙宿營之旅---- Day 1
第二朝, 我地吃過前一晚BBQ吃剩的食物後,
就call的士去梅窩, 準備轉船去長洲了.
响碼頭check過班次, 趁還未有船,
離遠欣賞下銀鑛灣景色.
兔寶寶一見欄杆就拉著不肯向前行,
佢以為自己拍緊監獄風雲呀!
後來先知呢D船仔同水上單車係銀鑛灣酒店出租架!
租金很便宜呢!
去長洲的渡輪是慢船, 雖然慢一點又無冷氣,
但我就是喜歡海風吹埋來;
搖下搖下的感覺, 不像快船的"拋"...
兔寶寶在船上又吃又喝, 很快就到達長洲了.
那些年, 我經常來長洲宿營架!
不過已經很久沒有來了...
一到步就馬上找東西吃,
呀公話去一年總會來長洲一兩次,
次次都是在呢間吃...
不過等食期間, 兔寶寶卻非常扭計...
我地叫咗5個餸,
包括蒜蓉白菜仔, 白灼蝦,
鮮魷炒芹菜, 炒蜆和蒸魚...
連埋四個白飯、一碗淨麵再加一支啤酒,
埋單都只是$270.
食物便宜, 當然質數都只是過得去而矣.
兔寶寶呢餐都好開胃架, 本來預佢唔食飯食麵的,
點知佢吃了大半碗飯, 再加許多餸.
不過吃飽飽之後佢都係繼續扭計,
呀公最快食飽, 拿拿淋抱走佢...
後尾我地响公園發現佢地,
呀公話呀B一直喊喊喊, 至見到遊樂場先識得停呀!
本來我地係一家人遊長洲的,
兔寶寶呢一日真係好扭計, 唔肯行,
要抱, 仲要指定我抱...
呀公無咁好耐性, 拉著呀婆兩個行先,
兔寶寶雙腳好像膠著似的, 一面大哭引途人注意....
最後我想起在梅窩碼頭等船時買了一支"吹波膠"(大家細個一定有玩過/見過人玩架!)
吹了一個波波逗BB.
不過呢D小玩意只能換來半分鐘安寧.
舅父最後敵不過兔寶寶, 抱起了她,
兔寶寶立刻乖乖投降...
原來有人要"食飽睡一睡, 好過做元帥"呀!
我地無帶BB車出來, 抱住熟睡的兔寶寶,
邊度都去唔到.
舅父無奈地坐底扮演人肉梳化...
而我呢?! 當然不會坐响度等,
借尿遁以搵廁所為名,
四圍逛了一逛呀~~~
(舅父睇到唔好揼我呀! ^^)
等咗好一會, 呀公同呀婆行完唔知邊度一轉之後,
兔寶寶終於醒了!
佢醒咗, 又係食野時間呀!
今次我地食長洲出名嘅魚蛋! 好多人排隊架!
我地買咗幾串丸, 有淨魚丸、蝦寶拼魷魚丸、蝦寶拼魚蛋, 同炸釀豆泡.
落完order後佢會幫你放入炸爐內翻熱, 所以外面脆脆的,
都幾好吃.
但要成$10/$15一串, 買了幾串就七十幾蚊, 真是不便宜呀!
食完丸丸, 呀公咖啡癮到,
要搵咖啡飲.
途中我地經過一舊式麵包店,
買了一大袋麵包做第二朝早餐.
行咗幾條街, 最終都係去咗一間舊式冰室,
每人叫了一份多士下午茶餐.
飲完咖啡, 呀公拉著呀婆話要去張保仔洞喎!
我等舅父埋完單行出來,
兩位老人家已經唔知行咗去邊, 賣甩我地了...
兔寶寶, 呀公驚咗你扭計呀!
唔緊要嘅, 我地一早已經議定搭四點幾果班船去返梅窩,
到時到侯响碼頭集合就得!
呢班由長洲去梅窩嘅船, 中途會停响芝麻灣,
呢度除咗有戒毒所之外, 正生書院都係响度架!
返去梅窩之後, 我地打算食埋晚飯先返入渡假屋.
但响長洲食得太多野, 要行陣先等落咗隔先有位吃晚飯呀!
於是我地行咗去銀鑛灣.
途經一個小型遊樂場,
又俾兔寶寶玩一陣先繼續走.
呢個時候本來唔肯跟舅父的兔寶寶卻忽然糖痴豆,
兩舅甥friend到不得了~
係呀, 兔寶寶揹著果條雞泡魚,
係我响長洲買俾佢嘅手信來架!
仲有一個"平安包"嘅防塵手機塞送俾大少添!
行到天黑, 我地去咗一間响山腰 叫"德仔記"嘅大排檔.
呢度D野食唔錯架!
因為中午响長洲食果碟炒蜆麻麻地, 我地响度叫一碟比較下,
當然係呢度好食好多啦!
因為呢碟小炒王, 我吃咗差不多兩碗飯呀!!
西蘭花炒鮮魷, 魷魚都好新鮮.
椒鹽瀨尿蝦: 我唔多食瀨尿蝦, 試咗一隻就覺得佢size太細,
大隻D會好D囉~~~~
因為我唔識食, 所以完全食不到有肉...
呢個時候, 我好掛住大少呀! 係佢先會幫我剝蝦肉...
蝦仁炒蛋.
成晚至差係呢碟琶琵豆腐呀!
呀公同舅父食不出有任何問題,
我和呀婆一食就知D豆腐變咗質了.
不過佢兩仔爺已經食咗好幾塊, 我同呀婆都不好意思出聲叫人換了.
**************************
食飽飽就返回渡假屋了!
兔寶寶做乜變咗木乃伊?
因為我除晒BB D衫準備沖涼先發現電熱水爐未夠熱水呀!
用毛巾包住呀B又怕佢會扯開,
唯有叫正在睇電視嘅舅父幫手按住條毛巾.
又估唔到兔寶寶會咁"順灘"喎~
洗完白白, 仲繼續撩舅父玩.
又騷擾正在做運動的婆婆, 四圍起火頭,
喂, 今晚唔係BBQ喎!
(續)
沒有留言:
張貼留言