兔寶寶嵗半家庭照(2012)----by FACE

10月24日  星期三  晴天

很早之前團購了一張攝影套餐卷,
在兔寶寶踏入嵗半的第二天,
我們一起到SOGO CLUB內的FACE STUDIO影相留念.

果度D攝影師哥哥好專業架~
好似影家庭相咁, 唔係排排坐,
叫你個頭歪D、條頸側D,
生生硬硬咁幫你影.
佢地好識引小朋友掛上最自然嘅笑容.
例如會叫其中一個大人抱住BB,
然後所有人一起走走走向中間集合,
好似玩遊戲咁, 攝影師就"咔刷"一聲捕捉BB最開心嘅時刻.
所以佢地唔單止影得好, 成個攝影過程都非常開心.

大少都好滿意, 仲同叫我揀多D相...
不過以我咁"豪爽"嘅性格, 當然係唔會再額外俾錢啦!
反正我覺得影兔寶寶單人部份唔係咁靚,
因為當時呀B已經掛住玩其他野,
已經無興趣望鏡頭了.

我見FACE都攪過幾次團購,
可能係咁啦, 個sales見我地無加相,
無黑面, 揀相過程中都無hard sell過我地,
只係循例話俾我地知加D乜野要幾多錢咁.

仲有一樣野係值得讚的,
雖然我地係無俾過任何額外錢佢賺,
到黃昏時我收到佢地電話,
話俾我知兔寶寶漏底咗一個玩具電話响果度.
雖然一件玩具唔值多少錢(甚至我係收到電話先發現不見了),
但我真係非常欣賞果度D員工態度認真呀!