第一次觀看音樂會 -- 我的音樂日記: 幼兒篇

3月24日  星期六  寒冷

今日兔寶寶已經好返好多,
PET PET雖然都係紅紅地,
起碼見唔到佢有想抓痕嘅動作.
多謝大家關心兔寶寶呀!
估唔到有咁多人關心兔寶寶個pet pet,
大少返工都不忘打幾次嚟問下BB個"蘿柚"乜野情況...
半夜放工返嚟仲主動幫BB換多次片!
呢D咪抵錫囉!!

尋日(星期五)一早兔寶寶舅父就過來接我地去香港大會堂,
因為我地買咗飛去聽BB音樂會.

呢個音樂會係特別為0至2嵗嘅BB設計架!
未去之前我仲諗會唔會係有D乜野音樂特別吸引BB去聽,
又或者現場有D乜野特別效果...
原來兩樣都唔係!


演奏廳外畫咗個區域放BB車, 亦都有臨時育嬰室.

兔寶寶: 襯表演未開始, 睇下場刊先!!

一開始個指揮兼主持(JASON)就講, 歡迎各位BB响音樂會途中大哭大叫大笑,
亦都唔會介意BB們行出行入(當然係指識行嘅B, 兔寶寶就享受唔到呢個權利喇!)
所演奏嘅都是一些膾炙人口, 大家都耳熟能詳嘅曲目,
方便家長們一邊响BB耳邊哼.
音樂會其中一個環節更加邀請家長們帶同小朋友到表演台前搖擺身體跳舞,
俾小朋友感受下拍子, 我當然有抱埋兔寶寶落去玩埋一份啦!
好多家長都很投入地抱埋子女跳舞(我有少少覺得係因為門票唔平, 唔投入就唔抵囉!!),
場面既溫馨又可愛莣笑.
與其說是音樂會, 輕鬆嘅氣氛像演唱會多些.

開頭都有擔心兔寶寶一早起身會掛住瞓,
又或者聽到一半唔耐煩, 大吵大鬧等...
雖然預咗, 但嘥錢嘛!!
而且佢食咗藥, 出發中途都係"偶吓偶吓", 唧都唔識笑咁.
幸好兔寶寶成個鐘頭都好投入, 大多時候都係開心地拍手,
或者好似指揮咁手舞足蹈,
反而無我想像中咁八八掛掛喎!

呢兩幅相係音樂會還未開始時拍的...

至於點解會無啦啦會同埋兔寶寶舅父仲有婆婆去聽音樂會呢?
其實係舅父嘅主意來!
亦都係舅父送俾兔寶寶嘅生日禮物!
係兔寶寶人生嘅第一份生日禮物!
當然, 呢份禮物相信已經消失咗响兔寶寶嘅記憶入面,
不過將來我會同返BB講, 佢人生第一個音樂會,
係舅父帶佢去的!!

我見網上有些家長話呢個音樂會有好多BB哭鬧聲,
小朋友根本不能投入,
又話二百幾蚊聽一個音樂會對BB嘅音樂潛能無乜積極作用云云...
聽完呢個音樂會, 我就覺得, 對比起買隻VCD聽一百九十幾次來說,
聽一次音樂會梗係無乜用啦,
不過作為一個family gathering嘅活動都係不錯的,
至少呢次經驗會比花錢用來吃一大餐難忘很多.
到兔寶寶大少少, 聽音樂會要坐定定嘅時候, 就唔會有今日抱住佢一齊跳舞嘅回憶,
同BB去聽音樂會嘅感受亦都幾難忘. 所以BB音樂會還是值得去一次,
我諗呀哥送呢樣野嚟做兔寶寶嘅生日禮物都係咁嘅意思吧!