放假半天

5月24日  星期五  晴天

星期三黑雨呢日,
我地瞓到成點幾兩點先起床!
之後大少有野做要出去一陣,
我就帶兔寶寶去食拉麵做午餐.

會合大少之後, 我地走咗去SOGO買野,
好開心三個人都買到戰利品呢!
Shopping完我地就行返去灣仔,
訂咗位六點半食BUFFET呀!

未夠鐘, 先行去附近文具鋪逛逛.
逛完兔寶寶仲未捨得走,
大少於是用一蚊同佢夾公仔.


大少呢個符碌精好輕易咁就夾到隻公仔喇~
兔寶寶似乎仲發緊夢, 都唔知佢攪乜?!

YEAH!! 係隻雞仔呀!
橫睇掂睇都係大少開心過兔寶寶囉~~~

兔寶寶從大少手上接過隻公仔後,
又塞返入攞公仔嘅果個窿窿入面.
大少拎返出來, 佢又塞返入去.
乜唔係唔可以隨便攞人地嘅野架咩!?
要一個廿五個月多D嘅人仔去理解夾公仔機呢個無聊玩意,
似乎係深奧咗D....

***********************

入到去呢間利景餐廳, 仲有五分鐘先食得,
兔寶寶又再次無聊中...

我嘅第一碟,
係夾俾兔寶寶吃嘅蒸魚,
和夾俾大少嘅羊扒.

之後又拎咗煙三文魚、千層麵同一舊芝士.

兔寶寶晏晝食果碗拉麵(幾乎成碗佢食晒!)都未落格,
食咗少少魚就開始食甜品.

送餐湯嘅麵包條反而成條食晒!
好彩佢唔洗計錢架姐!

無幾耐佢要扭坐DADDY大脾,
而我就按捺不住畢咗杯DREYER'S雪糕吃,
順手拎個雪糕筒俾呀B...
食個雪糕筒姐, 洗唔洗合埋晒眼咁陶醉呀?!

OMG!!! 原來佢係中緊眼瞓!

瞓著咗都仲要拎實半個雪糕筒留返俾佢好朋友----呀周公食呀!

睇返食物, 呢度唔算多種類,
但有我愛吃嘅長腳蟹和芝士盤.
爭食情況都唔太嚴重, 以每人二百幾蚊來計嘅晚市自助餐來說,
都叫食得過嘅.
不過大少喜愛嘅羊扒就出得一兩次, 佢就覺得麻麻地囉~


加上之後佢要咁樣食, 自然更加唔滿意啦!!

送嘅麥皮蝦, 每人兩隻.
講真,
如果係好少少嘅自助餐,
呢D蝦就算任我食, 我都唔會攞囉!

甜品反而算幾多樣化,
蛋糕款比較少, 大多係一小杯嘅甜品

因為呢度無濕毛巾/濕紙巾供應,
我食蟹又食到十分污糟, 好多野食都無影!

大少想把瞓著咗嘅兔寶寶放低响兩張拍埋咗嘅椅子上,
不過一放呀B就醒, 咁啱喇,
食我親手整嘅窩夫啦!

實在係太喜歡吃呢D夾餅類食物,
如此飽肚嘅東西, 我一個人就吃了四塊.

兔寶寶都係甜牙齒, 主動攞個煎推來吃.

食雪糕!

好喇, 食飽飽,
同DADDY影幅相留念啦!
睇大少反應呢度應該無下次架喇!

同媽咪影, 幾嗲?!

不過好快BB就俾枱面盤乾花吸引咗!

返到屋企兔寶寶仲食多大半個蕃薯做宵夜!