無癮的冬至 & 開心的平安夜前夕

12月23日  星期五  寒冷

尋晚做冬大家係咪食咗好多好野呢?
我地全日都係食粥同麵包咋!
因為大少病咗!
無返工, 睇醫生食埋藥,
大大話話瞓咗至少21個鐘...
所以呢...
我真係想講, 唔好成日"懶"大隻沖凍水涼,
又或者抵冷貪瀟湘,
真係病都少D架!

睇見大少沒精打采,
於是我早我一起床梳洗後,
就帶埋兔寶寶買咗份聖誕禮物俾大少,
雖則佢收到之後未至於精神百倍,
但都叫做有D喜色吖!

大少係少數極度姿整嘅男仕,
佢比我仲捨得買護膚品!
真係吹脹, 佢仲教我點樣嘅手勢洗面可以收雙下巴...
所以送護膚品俾佢無錯架喇!!


收咗禮物大少都唔好意思叫我煮飯喇!
晏晝去咗飲茶, 中途仲買咗對boot俾我添!!
我帶定蕃薯俾兔寶寶食,
因為我會忍唔住偷食, 所以要帶兩個!!
兔寶寶例牌一路食一路攪攪震...

叫咗好多野食,
有蛋散, 百花玉子豆腐, 芝士炸蝦筒, 家鄉炒米線;
仲有牛肉, 菜肉包, 煎釀孖寶,   綠豆沙係大少自己食晒架!!
真係補返尋日無胃口食果D...
所以我好肯定佢已經好返晒喇!!!
咁多野, 最終都係食唔晒打包....                             

兔寶寶坐唔定週身郁,
怕咗佢趺落地, 無耐都係要爸爸抱住....

不停咁整蠱做怪撩隔離枱D人玩,
攪到鞋都甩埋...

見大少食包, 佢又要食...

兔寶寶: (掙扎)我要成個包食晒呀 !!!