北上

2012年7月10日下午4:50

7月10日  星期二  晴天

好耐無出過"與大少的簡單生活"了...
尋日我地撇下兔寶寶俾婆婆,
兩個北上搥骨.

自從我懷孕以來一直都無北上了,
以前至少兩星期去一次搥骨, 晚上去玩到晏晝先返嚟.
今次我地早去早回,
大約八點幾九點出門口, 搭西鐵由柯士甸站去到紅磡,
再轉火車, 大約九點幾就到羅湖了.

去到羅湖火車站, 我地做咗一個錯誤決定,
响火車站嘅港式茶餐廳食早餐!
其實我已經响車站美心買咗麵包一路行一路食,
係平時唔食早餐嘅大少係都話要食...

叫咗一份: 蝦腸拼及第粥.
等咗N咁耐, 其間我地飽受毒氣(煙味)煎熬,
蝦腸終於到...

雖然蝦係用雪藏蝦, 一D都唔好吃,
但腸粉夠薄, 還算吃得過.

再等咗N咁耐, 及第粥終於到,
大少叫我幫手食D喎!
粥來講我最最最唔鍾意食就係及第粥,
因為D粥索咗D內臟味, 唔食內臟嘅我係DD粥都唔會食.
大少又唔係唔知, 叫得就預咗自己食晒佢架啦!
佢竟然發我圍...
(本身等咗N+N咁耐, 佢已經唔係咁好老脾, 因為我地好趕時間,
希望盡早回家湊返兔寶寶.)
我梗係唔SO佢啦...
其實本身碗粥一睇就知唔好食,
好似白飯溝味精水咁...

於是我地一啖都無食到碗粥, 就埋單走人了,
承惠人仔廿八元.

其實我地兩個成日嘈交架,
因為....哈哈, 我都幾串咀吓,
再加上大少都唔係溫柔嘅人;
不過呢, 嘈完之後好快又無事,
一出餐廳又攬頭攬頸咁...

之後嘅搥骨之旅都好暢順,
一連搥咗四個鐘, 又焗埋桑拿.
中途有免費IDD打返香港, 問吓呀媽兔寶寶點!?
佢話BB好乖, 無扭計喎! 咁我地都好開心可以繼續玩!
最後大少仲忍唔住買埋套票,
以後都可以成日出去搥了.

身心舒暢之後, 我地走咗去食晚飯,
呢間野以前經常來, 兩年幾無嚟,
D野貴咗好多!
由於大部份係唔飽嘅野, TOTAL 叫咗七碟餸...


先有蒜蓉炒豆苗,
呢碟記得叫佢少油.
加咗價, 以前18蚊加到20蚊..

灼鰤奄, 人仔18加到28...
今次唔記得叫佢灼熟D, 連殼都未開...

鰤奄真身, 今次真係生過頭,
有點血腥味, 熟些少會易入口D.

炒蜆, 人仔廿八, 殼多過肉,
而且炒得太濕...
印象中以前好食D.

扇貝仔, 人仔1蚊隻加到兩蚊隻,
我地叫咗一打, 廿四蚊.

最好食呢個, 豉油皇鴨舌, 三十八蚊...

一碟豆苗唔夠喉, 加單炒多一碟, 仲要加大, 30蚊,
真係大碟好多, 不過今次唔記得叫佢少油,
食落雖然唔覺, 用水洗一洗真係幾多油下,
唔想無啦啦食咁多酒落肚, 出街食菜都係搵水洗一洗隱陣D...

加單再叫多碟豉汁蒸帶子, 10蚊3隻,
叫半打廿蚊.

送老青島一支, 埋單人仔192元,
响大陸計真係貴咗好多,
係我地窮咗, 定D大陸人有錢咗呢?

食完飯搭的士去火車站,
太陽仲係好曬呢!
我地都未試過"去時係日頭, 走嘅時候又係日頭",
真係唔多夠喉, 大少仲好似唔係好捨得走咁...
雖然我都依依不捨想玩耐D, 但我好掛住兔寶寶呀!