追月夜

10月3日  星期三  晴天

呢兩父女攪乜?
攬埋一齊睇月光?!

星期一呢日追月, 大少終於放假喇!
公眾假期都係無謂去酒樓比錢同人逼,
我地又係去咗HIPOT食LUNCH.
今次係LUNCH HOUR 去, 雖然俾正價,
依然係好抵.
我嘅呢個餐, 賣廿八蚊.



大少照舊要雞王意粉餐, 今次收三十二蚊.

本來兔寶寶著咗條工人褲仔架!
點知食完LUNCH我地發覺佢條褲濕晒!
但條片又無濕過喎!
咁唯有返屋企換過套衫, 順便拎埋張團購coupon,
去DR. KONG換對鞋.

兔寶寶本來著住果對鞋係22号,
平時我摸下佢"頂指"未, 摸到仲有空位,
以為佢仲啱著, 未頂指.
所以屋企有對23号鞋, 都未拎出來俾佢換.
上次見Yahoo!攪團購, 多款Dr. Kong嘅BB鞋只賣$149,
於是買定對24号遲D著.

到試鞋時, sales姐姐從隻舊鞋中攞塊鞋墊一併,
才知原來舊果對22号鞋早已唔啱兔寶寶著!
個sales話你摸佢對鞋覺得有空間係因為BB會自己縮埋D腳指!
原來度鞋墊先係最正確嘅方法去知對鞋啱唔啱BB著!
委屈咗兔寶寶咁耐要屈起D腳指, 我都唔敢再俾佢著對22号鞋,
買完對24号鞋之後, 大少就抱住兔寶寶, 鞋都唔著,
返屋企換返對大少少嘅23号鞋先去街街了...

大少果日好想去海皮睇煙花架,
不過上網check吓先知煙花係九點先放,
睇完就好夜了.
於是我地出咗去旺角, 漫無目的咁行.
行行吓, 就去咗新世紀廣場個遊樂場....

兔寶寶嘗試自己坐鞦韆!

佢就玩得開心呀!
媽咪就一路睇一路擔心...

中秋過去, 商場又換上萬聖節的佈置...
我地後面果間, 係鬼屋嚟架!

行咗入鬼屋打個圈, 不過兔寶寶係一D都唔驚嘅...

行到六七點左右, 我地就行返落去花園街街市嘅大排檔食晚飯..
咦, 好少人咋喎!

睇呢幅相已經知, 兔寶寶一坐底又攪事了...

先嗌兩個餸, 分別係通菜炒牛肉.

同埋中式牛柳.

D餸細碟咗好多呀!
本來想影低佢一來到有幾細碟,
正在摷相機時,
但大少手快快用筷子將D餸撥埋一邊, 話影相好睇D喎~
見咁細碟餸, 平時唔食飯嘅大少都吃了一碗白飯.

後尾再叫多一碟: 通菜炒魷魚.
D魷魚很難吃呀! 早知要齋炒通菜啦!

三碟餸連白飯二百蚊.
呢一間大排檔之前坐無虛席架!
係佢自己成日加價不突止又愈整愈細碟.
去得大排檔就梗係想大碟夾抵食架喇!
難怪而家愈來愈少人幫襯.

臨走時見到同一層地方, 開咗另外兩間大排檔式食肆,
一間係食中式鑊氣小炒, 另一間食泰式燒烤,
兩間都好好生意, 下次我地都轉去試新野喇!

*************************************

講返第一幅圖,
話說大少想幫BB抺鼻水...

兔寶寶: 我係都要做鼻涕蟲!

兔寶寶: 唔好掂我鼻鼻呀!

兔寶寶: DADDY, 你睇你果邊??(出埋轉移視線呢一招添!)

兔寶寶: 我自己用手指抺都唔俾你抺...

最後, 大少不得不夾住兔寶寶強行清理鼻子.
旁人不知就裏睇就係一幅父女溫馨圖,
實質係"脅持人質"呀!