大少放假天

10月4日  星期四  晴天

記: 9月25日(星期二)

兔寶寶: 得閒無野做, 最好就係飲啖茶, 食個包.



兔寶寶: 今次我唔用手食, 用筷子........篤!

兔寶寶: 仲影?! 食野喇!

去飲茶食來食去都係果D野.
今次叫咗碟椒鹽九吐魚,
正到吖....好食過炸魚薯條十倍呀!

何解兔寶寶對住籠馬拉糕嘟起個咀?!

呢籠馬拉糕, 係眾多碟點心中最平嘅,
特價$7.8~~~
睇外表都無乜野特別.
一拎起, 嘩! 真係千奇百趣呀!
嚟自香港嘅縮水馬拉糕...

我無"禁"扁過佢架!
咁薄嘅馬拉糕, 俾大少真係兩啖同你食鬼晒...

兔寶寶: 吓?! 食晒喇?!



兔寶寶: 我唔信! 等我用隻匙摷下見唔見舊糕糕先...

*********************

飲完茶, 就要過海返playgroup.
時間尚早, 可以慢慢行去天星碼頭搭渡輪過海.
今次係兔寶寶第二次搭船, 佢又係瞓著咗呀!

難得一次搭船, 殘忍D都要,
摷醒呀B同大少影返張相啦!
今日寫blog時見到呢張相, 更覺難能可貴,
因為以後搭船我地都會隱隱陣陣坐好唔敢週圍走了.

去到中環行一陣, 就行去返playgroup嘅地方.
尚未夠鐘, 大少又同兔寶寶練吓行樓梯.

其實呢日嘅相已經被善忘的我收响"籠"底,
係尋日大少睇睇吓我個blog, 問點解少咗佢嘅相喎?!
所以呢幾張相唔post唔得...

上完堂, 又搭返船去尖沙咀.
落船後第一件事, 就係走入海港城換片片..
行過呢一度...叮噹...無咗喇!

呢一晚因為要等埋大少嘅朋友OT完畢之後食晚飯,
怕夜得滯肚餓所以响商場入面搵D野食少少打底先.
去咗KFC, 食大雞脾餐.
隻雞脾响KFC嚟講, 真係算幾大架!
個餐本來係跟白汁雞皇飯, 唔要飯加兩蚊可以轉格格薯...
我地無飯癮嘅當然轉啦!

跟餐加10蚊可以換多塊芝士雞肉多士,
都OK好味架!

食完KFC, 兔寶寶仲攞埋佢個燈籠出嚟玩添!