試衫 * 團購雞煲火鍋

9月4日  星期二 晴天



本來我地打算影一次婚紗相就算架喇,

不過之前見過有婚紗店推出影合家歡嘅團購,

千幾蚊就可以影一輯婚紗相之外,

仲可以俾埋兔寶寶做花女(連花女衫),

於是我就游說大少再影多輯.

我上次極力克制住自己唔响MONA LISA額外加相,

就係慳返D錢來買今次<法國婚紗>嘅團購呢!!

一收到優惠卷我地就立刻去咗尖沙咀嘅分店兌換並預約,

就返大少放星期一, 我地揀咗响尋日兩點鐘試衫,

下個禮拜一拍攝.

之前都有睇過網上評論說<法國>的sales姐姐又hard sell又串,

但不論我在尖沙咀預約又或者尋日試衫,

D姐姐都好友善啵, 仲係咁撩兔寶寶玩添!

有BB做親善大使係唔同D架!



尋日我地陪埋大少食午餐(我同兔寶寶一早就食咗野了),

就坐的士去到九龍塘的旗艦店.

很快我就試穿了十件一早在網上揀定的婚紗,

其中一件出自"巴黎世家"的款式, 要額外加八佰塊.

店員都見議我不要考慮加錢;

到大少選他的新郎禮服時,

大少揀咗件最basic的, 佢都無話游說佢加錢upgrade套衫,

唔hard sell我就無壓力了.



這是我揀的婚紗, 兔寶寶都很喜歡呢!




反而兔寶寶的花女衫令我有點點失望呢!

本來我這次去試衫最期待的就是試兔寶寶的禮服,

之前在尖沙咀分店時和店員確認過是有衫啱BB的,

但尋日我話想睇下D花女衫時,

店員卻說其實佢地D花女衫只係啱 D無咁細嘅女童,

所以到時兔寶寶要著返佢自己果件花女衫!

試完衫都係兩點九左右,

我地就慢慢行返去地鐵站.

途經見到一個遊樂場, 見到有BB玩嘅鞦韆,

咁就入去玩一陣啦!



第一次行草地, 有D驚添!

DADDY陪住玩木馬...






仲有玩鞦韆...http://www.youtube.com/watch?v=d9331kBsOvc&feature=player_detailpage
影片有D長,
有耐性睇嘅就會見到有隻大唔透响兔寶寶後面玩緊...

玩咗一陣, 就去咗行又一城.

兔寶寶: 最憎媽咪搵野笠住我個頭...

兔寶寶: 見係同媽咪你合照, 先俾你影吓啦!!
            影一陣好喇, 再影就發難架喇!!

兔寶寶: 唔搵野笠落嚟就再俾你影多幾幅啦!

响又一城行到五點九, 就行去搭地鐵返佐敦,
訂咗位食團購雞煲火鍋呀!

呢間係開業不久嘅"佐敦大排坊",
有成4層咁大.
由建築物外睇入去好似大排檔咁,
但佢又有晒知客咁, 洗手間都好乾淨.
可能係同唔慌正經嘅桑拿室同一棟樓,
成晚都唔係好多人咋喎!
而且眼見嘅好多都係團購嘅食客來的.

反正係响屋企附近, 都想試下佢,
食一次唔得下次咪唔幫襯囉!

一坐定即刻有侍應請我地自己選飲品,
接著又放下一碟刺身, 有三文魚, 象拔蚌和北寄貝,
三樣都幾新鮮.

所謂雞煲火鍋, 係先俾一個雞煲你食住先,
食到咁上下, 再加湯打邊爐.
雞煲可揀辣或者唔辣, 我地要唔辣.

咪睇佢唔係咁好樣, D雞幾好食架!
我地三兩下就食晒喇.

加湯後變咁樣, 跟住就可以劃紙任食佢嘅火鍋配料喇!

呢度食物款式唔多, 都係D大路野,
質數還可以(相對價錢來說).
大少仲不停讚佢D羊肉片好新鮮好好食添!
兔寶寶都食咗好多粟米同牛肉架!

唔知係咪新開張不久, 呢度D侍應同傳菜都好有禮貌.
即係呢, 平時我地去開嘅酒樓,
唔係高級果D, D傳菜員通常都係木口木面的,
而呢度果D放下食物後還會同你講: 請慢慢食呀!
最攪笑係其中一個伙計, 同我地傾多兩傾,
就問我地係點樣買呢D團購嘅優惠卷嘅呢?!
因為佢都覺得好抵好想買來放假食喎!

呢餐用嘅優惠卷只係一百九十八蚊,
所有野都包晒, 仲有埋啤酒汽水竹庶水酸梅湯任飲.
話限時兩個鐘, 我地食到過晒鐘都無俾人趕走.
食飽飽, 拍拍個籮柚就走得,
斗零都唔洗俾, 真係爽呀!