放假一天

3月27日  星期二  晴天

HI~~ 大家好!! 又係我地放假嘅相呀!!
我地放假來來去去都係果D活動,
無乜野特別架咋!!

尋日下午等大少起身, 就行咗去旺角食韓燒.
兔寶寶: 你地食咁鬼耐, 悶C我喇!!



兔寶寶: 等我撩吓隔離枱D人玩先!!
             "喂!! HELLO!! 呢邊有靚女呀!!"

再唔係自己同自己玩捉迷藏, 捐來捐去.

大少: 你隻小鬼阻住我食野, 等我捉實你先!!
兔寶寶: 嗚嗚!! 你唔可以咁樣對戰俘架!!

食完野, 去咗花園街行一陣,
又去咗金魚街睇狗仔.
之後去咗新世紀廣場換片+食奶.
攪掂晒個B, 大少仲响洗手間度未出嚟,
响育嬰室同兔寶寶影吓相先!

兔寶寶: 媽咪, 你影好D喎!!
                           記得影我三七面呀!!

晚上都係留响新世紀嘅food court入面食野.
我叫咗個汽鍋雞餐.
跟一個前菜, 係酸到呀媽都唔認得嘅酸青瓜;
一個小菜, 有大少鍾意食嘅椒鹽骨揀, 所以叫咗俾佢食;
仲可以揀一杯價值十四蚊嘅飲品,
我貼多四蚊出來, 叫咗杯十八蚊嘅香蕉朱古力奶,
點知中伏添,
又無香蕉味又無朱古力味,
都唔知自己飲緊乜...
個椒鹽骨太多炸粉太少肉, 乾真真, 唔好食.

跟餐加多十元八塊可以換多一個小食,
叫咗個豆沙餅, 又係超難食.
不過係自己叫嘅, 我都好有衣食咁食晒佢.
做女人都一樣要有膊頭咁嘛!!

大少叫嘅牛腩煲就正好多,
跟餐嘅油菜同埋凍咖啡都正正常常,
加幾蚊叫嘅小食雞翼就麻麻, 唔叫好過叫啦!

食晚餐期間有人好眼瞓喎!!

*********************************************

行多一陣返屋企, 中途大少又話要上洗手間.
丟下我地兩母女响條街度無無聊.
兔寶寶: 媽咪, 搵D野玩吓好喎!!

兔寶寶: 不如搓兩板吖!!